Rasijskija ŚMI dajmajuć ukraincaŭ na Alimpijadzie pytańniami pra ruskuju movu. «Što, nam u adkaz pytacca ab dopinhu i ahresii?»
U pieršy ž dzień zimovych Alimpijskich hulniaŭ u Piekinie adbyŭsia skandał pamiž rasijskimi prapahandystami i karespandentam, jaki piša dla ŭkrainskich ŚMI, Li Ryni. Detali skandału ŭ Fejsbuku paviedamiŭ prezident asacyjacyi spartyŭnych žurnalistaŭ Ukrainy Alaksandr Hlivinski, piša UNIAN.
05.02.2022 / 15:56
Sprečka ŭspychnuła paśla taho, jak Ryni zrabiŭ rasijanam zaŭvahu, što tyja zadajuć ukrainskim fihurystam Safii Haličenka i Arciomu Darenskamu pravakacyjnyja pytańni pra ruskuju movu.
«Paśla troch pytańniaŭ naš žurnalist źviarnuŭ uvahu rasijanina, što toj adzin za druhim zadaje pytańni pravakacyjnaha charaktaru: «Ci zabaroniena vašym atletam kamunikavać na ruskaj movie?», «Ci praŭda, što nielha mieć znosiny z rasijskimi atletami?».
Naš žurnalist łahična spytaŭ kalehu: «Ci nie varta ŭ hetaj miks-zonie havaryć pra fihurnaje katańnie?» Vidać, nie spadabałasia zaŭvaha. Ale žurnalisckaja etyka na spartyŭnych padziejach — reč viadomaja. Što, nam ciapier u adkaz zasypać rasijskich atletaŭ pytańniami ab dopinhu i vajennaj ahresii Rasii?» — pacikaviŭsia Hlivinski.
Pavodle jaho słoŭ, rasijanie byli hatovyja da takoha raźvićcia padziej i zdymali ŭsio na kamieru.
«Na videa vyrazna čutnyja anhłamoŭnyja maciukalnyja słovy ŭ bok ukrainskaha žurnalista, jak i vidać toje, što naš kaleha vyrašyŭ nie adkazvać na nikčemnyja pavodziny hetaha, z dazvołu skazać, pradstaŭnika ŚMI, jaki ŭžo nie ŭpieršyniu parušyŭ i žurnalisckuju, i ahulnačałaviečuju etyku»,
— adznačyŭ jon.
Kanflikt skončyŭsia biez abvastreńniaŭ, rasijanin urešcie syšoŭ, udakładniŭ Hlivinski.
Ukraina z nahody pavodzin rasijskich ŚMI źvierniecca da Mižnarodnaj asacyjacyi spartyŭnaj presy (AIPS).
Trenier fihurystaŭ Haličenka i Darenskaha Liłija Batucina napiaredadni taksama paskardziłasia na dziejańni rasijskich ŚMI, jakija apublikavali «intervju» ź jaje spartśmienami, nazvaŭšy rasijan «haŭniukami».
Sa słoŭ žančyny, rasijski prapahandyst prapchnuŭsia da fihurystaŭ, pierabiŭšy ŭkrainskaha žurnalista, i zadaŭ im pytańnie, ci razmaŭlajuć jany ź inšymi zbornymi.
«Jakija ž miarzotniki, fu! Maje spartśmieny nie davali nijakaha intervju! Tolki našamu žurnalistu, jaki byŭ va ŭkrainskaj formie i mieŭ znosiny ź imi na ŭkrainskaj! A na pytańnie z boku rasijskaha žurnalista, jaki ŭlez u razmovu, ci razmaŭlajuć jany z kamandaj Alimpijskaha kamiteta Rasii, jany adkazali: «My starajemsia nie kantaktavać ciapier ni ź jakimi kamandami praz karanavirus. Usio, što treba viedać ab podłaści rasiejskich ŚMI. Motašna, brydka. Jak možna tak ź dziećmi? Haŭniuki»,
— vykazałasia Batucina.
U kamientary rasiejskamu «Sport-ekspres» Safija Haličenka i Arciom Darenski zajavili, što im nie zabaroniena mieć znosiny na ruskaj movie na Alimpijadzie ŭ Piekinie. Taksama rasijanie dapytvalisia pra «zabaronu» razmaŭlać na ruskaj movie ŭ ukrainskich fihurystaŭ Alaksandry Nazaravaj i Maksima Nikicina.