Italjancy šukajuć uładalnika 140-mietrovaj jachty. Im moža być Pucin
Va ŭsioj Jeŭropie miascovyja ŭłady adsočvajuć luksavuju majomaść, što moža być źviazanaja z blizkimi da Kramla aliharchami. U tym liku pad uvahu palicyi trapiła šykoŭnaja «Šachierezada» — adna z najvialikšych, samych novych i darahich jachtaŭ u śviecie.
08.03.2022 / 20:22
Fota: Bulent Erbas.
Daŭžynia «Šachierezady», jakaja znachodzicca ŭ italjanskim horadzie Maryna dzi Karara, składaje kala 140 mietraŭ, jaje prykładny košt — 700 miljonaŭ dalaraŭ. Na jachcie jość dźvie viertalotnyja pałuby, basiejn, jaki možna pieratvaryć u placoŭku dla tancaŭ, trenažornaja zała z usim patrebnym i pazałočanaje ŭbrańnie ŭ vannych, piša New York Times.
U śviecie isnuje ŭsiaho 14 jachtaŭ daŭžynioj nie mienš za 140 mietraŭ, i «Šachierezada» — adzinaja ź ich, čyj uładalnik nieviadomy. Šmat chto ličyć, što im moža być miljarder z Blizkaha Uschodu ci niejki rasijanin, mahčyma, navat Uładzimir Pucin.
Fota: Tom van Oossanen.
Kapitan karabla, brytaniec Haj Bienet-Pirs, admaŭlaje toje, što Pucin vałodaje jachtaj ci kali-niebudź na joj prysutničaŭ. Bienet-Pirs śćviardžaje, što nikoli nie sustrakaŭsia z Pucinym i što ŭładalnik jachty nie znachodzicca pad sankcyjami. Pry hetym kapitan nie vyklučaje, što ŭładalnik jachty moža być ruskim, ale admaŭlajecca davać dalejšyja kamientaryi praz zabaronu vydavać infarmacyju.
Italjanskaja finansavaja palicyja adkryła rasśledavańnie ŭ dačynieńni da nieviadomaha ŭładalnika jachty. Śledčyja ŭžo naviedvali karabiel, i Bienet-Pirs byŭ vymušany pieradać im dakumienty, dzie prysutničaje imia zahadkavaha miljardera.
Mahčyma, «Šachierezada» nie pryciahvała b stolki ŭvahi, kali b nie ŭzrovień sakretnaści, što atačaje jachtu. Kamanda karabla i inšy piersanał, što pracuje na jachcie, padpisvajuć pahadnieńni ab niavydačy infarmacyi, ale takaja zjava charakternaja i dla inšych hihanckich jachtaŭ. Bolš dziŭna toje, što na jachcie prykryvajuć šyldačku, dzie paznačanaja jaje nazva.
«Šachierezada» ŭ centry. Fota: Gaia Pianigiani / The New York Times.
Kali karabiel upieršyniu zjaviŭsia ŭ porcie, vakoł jaho raźmiaścili vysoki mietaličny barjer, jaki častkova zakryvaje jachtu ad vačej minakoŭ. Niekatoryja miascovyja žychary kažuć, što nikoli nie bačyli ničoha padobnaha ŭ vypadku ź inšymi jachtami.
U padtrymku teoryi, što jachta naležyć čałavieku z Blizkaha Uschodu, śviedčyć jaje nazva — karabiel nosić imia hieraini arabskich kazak. Viadoma, što ŭ 2020 hodzie «Šachierezada» była ŭ Čyrvonym mory i zachodziła ŭ jehipiecki port Churhada.
Miascovyja žychary, u svaju čarhu, kažuć, što čuli, jak členy kamandy karabla hutaryli pa-rusku. Jašče adna suviaź jachty z Rasijaj — toje, što adna z simfonij ruskaha kampazitara Rymskaha-Korsakava nosić nazvu «Šachierezada». Miascovyja pamiž saboj nazyvajuć hety karabiel «jachta Pucina», ale ŭ Italii heta ŭmoŭnaja nazva dla luboj tajamničaj i šalona raskošnaj jachty. Miž tym, jość źviestki, što navat členy kamandy nazyvajuć karabiel pamiž saboj «jachta Pucina».