Čamu nie adbyŭsia šturm Adesy
Ukraincy vykasili rasijskuju marskuju piachotu pad Maryupalem i Mikałajevam. Šturmavać hałoŭny horad na ŭźbiarežžy Čornaha mora niama kim.
22.03.2022 / 14:43
Pomnik Dziuku Rešylje ŭ Adesie abkładzieny miachami ź piaskom. Fota: Ukrinform.
Pierad uvarvańniem Rasii va Ukrainu zachodnija raźviedki zdabyli płany rasijskaj armii. Adesa, najbujniejšy ŭkrainski port, była ŭ ich pryjarytetam. Na karcie kirunkaŭ uvarvańnia na Ukrainu, jakuju pakazaŭ Alaksandr Łukašenka, udar praz Adesu na Małdovu taksama značyŭsia.
Čamu ž Adesa dahetul u biaśpiecy?
Miarkujučy pa ŭsim, ukrainskija vajskoŭcy pad Mikałajevam i Maryupalem praktyčna całkam źniščyli asabovy skład padraździaleńniaŭ marskoj piachoty RF, jakija pavinny byli nastupnym punktam šturmavać Adesu.
Pra heta, u pryvatnaści, paviedamiŭ u Facebook śpikier apieratyŭnaha štaba Adeskaj abłasnoj vajennaj administracyi Siarhiej Bratčuk.
Ukraincy byli padrychtavanyja da sustrečy rasijskaha desantu i nanieśli jamu vialikija straty.
Samyja zaciatyja bai ciapier praciahvajucca na poŭdni Ukrainy. Kantrol nad hetym rehijonam dazvoliŭ b Maskvie abjadnać «dałučany» u 2014 hodzie Krym z kantynientalnaj Rasijaj.
Žychary Adesy nasypajuć piesok u miaški dla barykad. Skrynšot z Suśpilnie TV.
Za apošnija tydni źmianiłasia rytoryka aficyjnaj rasijskaj prapahandy — jaje fokus źmiaściŭsia z «uziaćcia» Kijeva na Maryupal. Kali napačatku rasijskaja prapahanda publikavała bravurnyja materyjały pra toje, što Ukraina budzie likvidavanaja jak dziaržava, a Pucin asabista zaklikaŭ ukrainskuju armiju da źviaržeńnia zakonna abranaha kiraŭnictva krainy, to ciapier rasijskija aficyjnyja asoby paŭtarajuć, što akupacyja Ukrainy nie ŭvachodzić u ich płany.
Ukrainskija vojski praciahvajuć abaraniać asadžany Maryupal. U toj ža čas praciahvajucca bai na podstupach da Kurachova, Zaparožža i Kryvoha Roha. A na kirunku Chierson — Mikałajeŭ ukraincy pierajšli ŭ kontrnastup.