U Dziaržynsku bolš za tydzień pravodziłasia «śpiecapieracyja» pa pošuku «rejkavych partyzan»
Pravaabaroncam stali viadomyja padrabiaznaści represij u Dziaržynsku, dzie bolš za tydzień siłaviki pravodzili rejd pa pošuku «rejkavych partyzan». Miascovych žycharoŭ zatrymlivali i źmiaščali ŭ IČU, u ich damach ładzili pieratrusy, a niekatorych źbivali padčas zatrymańniaŭ. U izalatary ich utrymlivali ŭ žorstkich umovach: u kamierach chałodna, nie vydavali matracaŭ, pieradačy nie prymali, paviedamlaje «Viasna».
30.03.2022 / 19:50
Padrabiaznaści viadomyja pakul pra adzin vypadak. Stała viadoma, što ranicaj 21 sakavika supracoŭniki HUBAZiKa zatrymali žančynu, u jakoj jość niepaŭnahadovaje dzicia. U pastanovie na pieratrus značyłasia, što kryminalnaja sprava tyčycca čyhunačnaj dyviersii 18 sakavika na stancyi «Kołasava».
U žančyny zabrali telefon, a ŭ RAUSie na jaje skłali pratakoł pa art. 19.11 KaAP (raspaŭsiud ekstremisckich materyjałaŭ) za pierasył paviedamleńnia z «Chartyi-97» svajoj dačce. Sud pryznaŭ jaje vinavataj. U vyniku žančyna była pakaranaja štrafam u pamiery 20 bazavych vieličyniaŭ (640 rubloŭ).
Raniej paviedamlałasia pra padobnyja rejdy i ŭ inšych nasielenych punktach, a ŭ roznych miascovaściach ludziej aryštoŭvajuć pa padazreńniach u dyviersijach na čyhuncy, i im inkryminujucca ciažkija kryminalnyja artykuły.