Advakat, jakomu vynieśli vymovu za padpisańnie pietycyi suprać vajny va Ukrainie, baraniŭsia cytatami z Łukašenki. Ale infarmacyja ŭ ich «nie adpaviadaje rečaisnaści»
Paśla pačatku poŭnamaštabnaj vajny va Ukrainie ŭ Biełarusi stvaryli pietycyju ad biełaruskich advakataŭ i jurystaŭ, u jakoj asudzili napad Rasii. Pietycyju padpisaŭ i advakat Andrej Biełachvost. Za heta mužčyna atrymaŭ vymovu, jakuju paśla abskardziŭ u biełaruskaj Respublikanskaj kalehii advakataŭ, a zatym u sudzie. Niadaŭna jon atrymaŭ na ruki matyvirovačnuju častku rašeńnia, vyniatki ź jakoj nadrukavaŭ sajt «Zierkało».
19.07.2022 / 19:51
Andrej Biełachvost
U svajoj pietycyi advakaty i jurysty patrabavali «nieadkładnaha spynieńnia vajennych dziejańniaŭ va Ukrainie», zajaŭlali niazhodu z tym, što «terytoryja Biełarusi stała płacdarmam dla raźmiaščeńnia rasijskich vojskaŭ, jakija viaduć bajavyja dziejańni ŭ Ukrainie, i naša kraina ŭciahnutaja ŭ hety kanflikt».
Za podpis pad hetaj pietycyjaj Andrej Biełachvost i atrymaŭ vymovu ad Minskaj abłasnoj kalehii advakataŭ.
Frahmient z pastanovy Mienskaj abłasnoj kalehii advakataŭ ab pryciahnieńni advakata da dyscyplinarnaj adkaznaści. Fota pradastaŭlena surazmoŭcam
«Pazicyja Savieta Kalehii zaklučałasia ŭ tym, što pietycyja suprać vajny ŭtrymlivała niedakładnuju infarmacyju pra ŭdzieł u joj Biełarusi», — raspaviadaje advakat.
Z takoj pazicyjaj i arhumientami surazmoŭca nie pahadziŭsia. Abskardžańnie svajho spahnańnia jon užo nakiravaŭ u Respublikanskuju kalehiju advakataŭ.
Frahmient pastanovy Savieta Biełaruskaj respublikanskaj kalehii advakataŭ. Fota pradastaŭlena surazmoŭcam
«Pry abskardžańni ja rabiŭ spasyłki na cytaty z vystupaŭ Łukašenki ŭ pacviardžeńnie źmiestu pietycyi — raźmiaščeńnie rasijskich vojskaŭ, vypusk rakiet i da taho padobnaje. Vystupy bralisia z dziaržSMI abo aficyjnych sajtaŭ, — tłumačyć mužčyna. —
Ale kalehija ŭsio adno paličyła, što fakty ŭ hetaj pietycyi nie adpaviadajuć rečaisnaści, choć Łukašenka sam pacviardžaŭ usio adlustravanaje ŭ joj. Pry hetym kalehija nie pradstaviła ničoha ŭ pacviardžeńnie svaich słoŭ, akramia samoj hetaj frazy.
Frahmient pastanovy Savieta Biełaruskaj respublikanskaj kalehii advakataŭ. Fota pradastaŭlena surazmoŭcam
Paśla atrymanaj admovy ad arhanizacyi Andrej źviarnuŭsia ŭ sud. Ale i tam vymovu advakatu pryznali pravamiernaj, a z arhumientami kalehii pahadzilisia.
«Sud u svajoj matyviroŭcy adznačyŭ, što niedakładnaść pietycyi pacvierdžanaja materyjałami dyscyplinarnaj vytvorčaści. Ale ŭ ich, akramia frazy «nie adpaviadaje rečaisnaści», ničoha i niama.
Voś taki vychodzić paciešny zahanny kruh: z adnaho boku, Łukašenka sam pacviardžaje źmiest pietycyi, z druhoha — sud ličyć jaje niedastaviernaj».