Biełaruś u minułym hodzie była najbujniejšym u śviecie pastaŭščykom alternatyŭnaj ikry
Pra heta paviedamlaje partał Worldstopexports, jaki śpiecyjalizujecca na analizie ekspartnych patokaŭ. «Asnoŭnymi pastaŭščykami alternatyŭnaj ikry źjaŭlajucca Biełaruś, Japonija, Kitaj, Hiermanija i Danija», — havorycca ŭ ich paviedamleńni.
25.08.2022 / 23:10
Pavodle źviestak partała, Biełaruś u 2021 hodzie ekspartavała ikry nieasiatrovych ryb na $74,5 młn, što skłała 19,2% ad ahulnaj suśvietnaj sumy ekspartu hetaj pradukcyi.
U 2021 hodzie siaredniaja suśvietnaja cana za adzinku ikry, vyrablenaj ź ikry nieasiatrovych ryb, składała 13 559 dalaraŭ za tonu, «što składaje ŭsiaho 7,4% ad siaredniaha suśvietnaha koštu za adzinku tradycyjnaj asiatrovaj ikry (183 391 dalaraŭ za tonu)».
Pry hetym ekśpierty adznačyli, što siaredniaja cana na alternatyŭnuju ikru vyrasła na 43,2% u paraŭnańni z pakazčykam u 9 466 dalaraŭ za tonu hodam raniej.
«Biełaruś, najbujniejšy eksparcior ikry nieasietravych ryb, u 2021 hodzie atrymlivała adnosna ekanamičnyja 7 048 dalaraŭ za tonu», — paviedamlaje partał.
Zrešty, lidar u hetaj sfiery Biełaruś nie pieršy hod. Pieršaj u śviecie jana była i ŭ 2020 hodzie, na jaje dolu prypadała 20,2% usiaho suśvietnaha ekspartu hetaha praduktu. Ale zarabili tady na hetym mienš — 61,8 młn dalaraŭ.