Baranavickaha «Mirona» asudzili za raźviešvańnie 17 biełaruskich ściahoŭ na linijach elektrapieradačy
U sudzie Baranavickaha rajona 6 vieraśnia vyniesieny prysud miascovamu žycharu Uładzimiru Branavickamu, jakoha abvinavacili ŭ chulihanstvie pavodle č. 1 art. 339 Kryminalnaha kodeksa, paviedamlaje «Viasna».
06.09.2022 / 14:46
Spravu razhladała suddzia Aksana Kopač, dziaržabvinavaŭca — pamočnik prakurora Vadzim Karačun.
Palitźniavoleny Uładzimir Branavicki — majstar sportu pa paŭerliftynhu. Byŭ zatrymany 17 červienia 2022 hoda. Uładzimira abvinavačvajuć u tym, što z 1 studzienia pa 16 červienia 2022 hoda jon raźviešvaŭ «pratesnuju simvoliku» na linijach elektrapieradač u Baranavičach, a taksama na terytoryjach Baranavickaha i Lachavickaha rajonaŭ. Suprać mužčyny raspačali kryminalnuju spravu za chulihanstva.
Taksama viadoma, što Branavicki padpisvaŭ list ab spynieńni represij ad imia spartoŭcaŭ u kancy žniŭnia 2020 hoda.
Pa materyjałach abvinavačańnia, Uładzimir Branavicki «u pieryjad času z 1 studzienia pa 15 červienia 2022 hoda ŭ ciomny čas sutak, znachodziačysia ŭ hramadskich miescach Baranavičskaha rajona, z chulihanskich pamknieńniaŭ z vyklučnym cynizmam 17 razoŭ raźmiaściŭ na aporach elektrapieradač kala aŭtadaroh samarobnyja vyraby z pałotniščaŭ ŭ bieła-čyrvona-biełych kolerach».
Miascovyja žychary paviedamlali pra ściahi ŭ milicyju.
Ad pasłuh advakata Branavicki admoviŭsia, svaju vinu ŭ sudzie całkam pryznaŭ.
Padčas sudovaha śledstva abvinavačany patłumačyŭ, što pierasoŭvaŭsia pa terytoryi rajona na rovary. Samastojna vyrabiŭ admysłovaje prystasavańnie z začepam i špahatam, z dapamohaj jakoha zakidvaŭ pałotniščy na pravady elektrapieradač.
Baranavičski fiłijał RUP «Brestenierha» vystaviŭ materyjalnuju pretenziju ŭ sumie 1277 rubloŭ, jakuju Uładzimir pryznaŭ. Jana budzie razhledžanaja asobna ŭ miežach hramadzianskaj sudavytvorčaści. Pakul ža pad aryštam zastajecca aŭtamabil i inšaja technika Branavickaha.
Abvinavačańnie zaprasiła dla Branavickaha adzin hod kałonii ahulnaha režymu.
Mienavita taki prysud i ahučyła suddzia Aksana Kopač.