Za niekalki kamientaryjaŭ šmatdzietnaha baćku pasadzili na 1,5 hoda

U sudzie Maskoŭskaha rajona Minska 22 vieraśnia na paŭtara hoda kałonii va ŭmovach ahulnaha režymu asudzili 48-hadovaha šmatdzietnaha baćku Paŭła Łaryna. Za kamientaryi ŭ telehram-čatach i kanałach jaho abvinavacili ŭ abrazie pradstaŭnika ŭłady i Łukašenki (artykuły 369 i 368 Kryminalnaha kodeksa). Prysud vyniesła suddzia Taćciana Pirožnikava, paviedamlaje «Viasna».

22.09.2022 / 13:30

Paŭła asudzili pa troch epizodach. U kancy 2020 hoda jon u telehram-kanale pakinuŭ kamientaryj, jaki «źnievažaŭ hodnaść» tady jašče ministra ŭnutranych spraŭ Juryja Karajeva. Taksama, zhodna ź viersijaj abvinavačvańnia, Łaryn pakinuŭ kamientaryj u dačynieńni da Łukašenki — dopis pryznany abraźlivym. A 24 lutaha 2022 hoda ŭ dvarovym telehram-čacie mikrarajona «Malinaŭka» Łaryn vykazaŭsia pra «śpiecyjalnuju vajennuju apieracyju». Sami kamientaryi na sudzie nie ahučvalisia. 

Na pracesie palitviazień pryznaŭ vinu i pacvierdziŭ, što jon sapraŭdy pakidaŭ kamientaryi.

Pavieł — šmatdzietny baćka, na voli jaho čakajuć čacviora dziaciej, dvoje ź jakich — małaletnija. U apošnim słovie jon prasiŭ suddziu nie pazbaŭlać jaho voli, tamu što dzieci majuć patrebu ŭ baćku pobač z saboj. Prakuror 21 vieraśnia zaprasiŭ dla Paŭła pavodle č. 1 art. 369 i 368 KK paŭtara hoda kałonii va ŭmovach ahulnaha režymu. Mienavita taki prysud vyniesła na nastupny dzień suddzia Pirožnikava.

Pad vartaj Pavieł utrymlivajecca z 14 červienia 2022 hoda. U lutym jaho aryštoŭvali na 15 sutak za paviedamleńnie ŭ rajonnym čacie, dzie jon vykazaŭsia suprać vajny.