SBU: Nastaŭnikaŭ z akupavanych terytoryj buduć sudzić za sam fakt pracy na akupantaŭ, miedykaŭ — tolki kali zajmali kiraŭničyja pasady
Słužba biaśpieki Ukrainy patłumačyła, za što nastaŭnikam i miedykam, jakija žyli i pracavali na akupavanych terytoryjach, pahražaje pakarańnie. Akazałasia, što adkaznaść budzie niaroŭnaja: kali miedyki mohuć raźličvać na razumieńnie ichniaj situacyi, to nastaŭniki nie.
23.09.2022 / 16:53
Fota: «Suśpilnie Chierson»
«Nastaŭniki i vykładčyki, jakija na akupavanych terytoryjach pahadzilisia navučać školnikaŭ i studentaŭ pavodle rasijskich standartaŭ, buduć nieści kryminalnuju adkaznaść, a miedyki buduć pakaranyja tolki ŭ vypadku zhody zajmać kiroŭnyja pasady pry akupantach», — paviedamiŭ pres-sakratar Słužby biaśpieki Ukrainy Arciom Dziechciarenka na bryfinhu 23 vieraśnia.
Dziechtiarienka adznačyŭ: «Zrazumieła, što peŭnyja sfiery žyćciadziejnaści znachodziacca pad achovaj mižnarodnaha zakanadaŭstva. Heta značyć, umoŭna:
miedyk, jaki vykonvaje svaju klatvu Hipakrata i ratuje žyćci ludziej, vyzvaleny ad adkaznaści, bo ŭ jaho dziejańniach niama kałabaracyjanizmu abo dziaržaŭnaj zdrady.
Razam z tym, kali hety čałaviek pahodzicca zaniać kirujučuju pasadu ŭ psieŭdaorhanie achovy zdaroŭja, tady my budziem prymać adpaviednyja miery.
Što tyčycca rabotnikaŭ adukacyjnaj sfiery, to im treba być bolš pilnymi, tamu što ŭ ramkach dziejnaha zakanadaŭstva…
kali supracoŭnik sfiery adukacyi budzie ŭkaraniać adukacyjnyja standarty dziaržavy-ahresara va ŭkrainskich navučalnych ustanovach abo budzie spryjać ustalavańniu akupacyjnaj ułady ŭ hetym časova akupavanym rehijonie, to jon budzie adkazvać pa zakonie».
3 sakavika 2022 hoda Viarchoŭnaja rada ŭniesła ŭ KK artykuł 111-1 ab kałabaracyjnaj dziejnaści. Hety artykuł praduhledžvaje adkaznaść nastaŭnikaŭ, jakija vučyli dziaciej na akupavanych terytoryjach: jany mohuć być asudžanyja da 3 hadoŭ pazbaŭleńnia voli abo hramadskich rabot terminam na 2 hady.