Miemy, stykiery i kałažy: karystalniki iOS 16 kreatyviać z funkcyjaj vydaleńnia fonu dla fotazdymkaŭ
Jašče ŭ červieni Apple pradstaviła šerah cikavych novych funkcyj dla svajoj novaj apieracyjnaj sistemy iOS 16. Ale nivodnaja ź ich nie pryniesła stolki ździŭleńnia i radaści karystalnikam, kolki zmanliva prostaja funkcyja vyrazańnia fotazdymkaŭ — udaskanaleńnie ŭžo isnujučaj sistemy Visual Lookup, što była zapuščanaja letaś na iOS 15.
25.09.2022 / 11:48
Jana raspaznavała žyvioł, raśliny, słavutaści i inšyja abjekty na fota, ale ciapier, kali vy dakranajeciesia da abjekta vyjavy i ŭtrymlivajecie jaho, vy možacie vyrazać hety abjekt dla vykarystańnia ŭ inšych prahramach. Pra toje, jak kreatyŭna karystalniki pačali padychodzić da novaj «fičy», piša resurs TechCrunch.
Visual Lookup dazvalaje abrać luby abjekt z fota i zachavać jaho jak asobnuju prazrystuju vyjavu. Pa sutnaści, funkcyja addzialaje fon zdymka ad abjekta, a potym pieratvaraje abjekt u asobnuju vyjavu. Zatym hety abjekt možna zachavać abo pieraciahnuć u mesendžar.
Funkcyja nadziva dobra pracuje z žyviołami, ludźmi i roznymi pradmietami.
Spažyŭcy znachodziać usio bolš varyjantaŭ vykarystańnia pryłady, pačynajučy ad fatahrafavańnia ježy i zakančvajučy stvareńniem kałažaŭ z chatnimi žyviołami.
Adzin ź cikavych varyjantaŭ vykarystańnia — katałahizacyja vyjaŭ u roznyja papki: dla ježy, pakupak, chatnich žyvioł ci štodzionnych uboraŭ. Naprykład, karystalniki mohuć «zachoplivać» svaju vyjavu kožny raz, kali jany mianiajuć vopratku, i ŭstaŭlać jaje ŭ natatku, kab katałahizavać svaje roznyja vobrazy.
Vidavočna, jak vynik vykarystańnia hetaj funkcyjaj chutka my pabačym novuju chvalu zroblenych takim čynam miemaŭ i nieźličonych stykieraŭ z žyviołami.
Apple nie adzinaja kampanija, jakaja demanstruje mahčymaści «štučnaha intelektu», źviazanyja z raźjadnańniem abjektaŭ. U minułym hodzie Google pradstaviŭ funkcyju Magic Eraser z Pixel 6, jakaja dazvalaje vydalać niepatrebnyja abjekty z fota, zachoŭvajučy inšyja častki vyjavy niekranutymi.
Abiedźvie hetyja funkcyi majuć svaje vartaści, i abiedźvie vielmi karysnyja ŭ štodzionnym redahavańni fotazdymkaŭ. I karystalniki vykazvajuć dumku, što było b vydatna, kab Google i Apple vyrašyli skapijavać adzin adnaho i ŭklučyli abiedźvie hetyja funkcyi ŭ svaje mabilnyja apieracyjnyja sistemy.