Абвешчаныя новыя драконаўскія прысуды: гэтым разам сябрам ініцыятывы «Буслы ляцяць»
Суддзя Анастасія Папко сёння прызначыла вялікія тэрміны шасці фігурантам справы ініцыятывы «Буслы ляцяць». Яны дасягаюць 15 гадоў калоніі, піша «Вясна».
28.09.2022 / 17:44
Аляксею Іванісаву прысудзілі 14 гадоў калоніі і штраф у 500 базавых.
Аляксею Гамезу — 14,5 гадоў калоніі і штраф у 500 базавых.
Мікалаю Біблісу — 8,5 гадоў калоніі і штраф у 300 базавых.
Андрэю Будаю — 15 гадоў калоніі і штраф у 500 базавых.
Аляксандру Мураўёву і Аляксандру Сідарэнку — па 12 гадоў калоніі кожнаму.
У залежнасці ад ролі кожнага ў розным спалучэнні хлопцаў абвінавачваюць ва:
- удзеле ў ініцыятыве «Буслы ляцяць», якая прызнаная структурамі лукашэнкаўскага рэжыму тэрарыстычнай;
- удзеле ў акцыях пратэсту;
- пашкоджанні аўтамабіля суддзі Барысаўскага раёна і шын аўтамабіля актывіста-карэспандэнта цэнтральнага СМІ;
- кіданні камянёў у вокны кватэры мінскага пракурора і праўладнай актывісткі;
- знішчэнні сістэмы відэаназірання ў Фрунзенскім раёне Мінска.
Суд па справе па хадайніцтву пракуроркі зрабілі закрытым, ён ішоў амаль 4 месяцы.
Перад сённяшнім судовым пасяджэннем паміж «пацярпелымі» і 76-гадовай маці Іванісава Наталляй адбыўся канфлікт. Група падтрымкі «пацярпелых» пачала наракаць, што, маўляў, з-за такіх як абвінавачваныя «ўсё адбываецца і можа пачацца вайна».
Маці Іванісава не вытрымала і нешта ім адказала. На яе выклікалі нарад міліцыі. На 76-гадовую жанчыны міліцыянты склалі пратакол аб адміністрацыйным правапарушэнні.