Zabaraniajuć raspaŭsiudžvańnie statystyki: «moža škodzić» paradku i maralnaści
Pałata pradstaŭnikoŭ ŭ pieršym čytańni pryniała źmieny ŭ zakon ab dziaržaŭnaj statystycy. Adna z papravak, u pryvatnaści, uzakońvaje abmiežavańnie raspaŭsiudžvańnia aficyjnaj statystyki, piša pres-słužba parłamienta.
12.10.2022 / 15:09
Fota: pres-słužba Pałaty pradstaŭnikoŭ
Zakonaprajekt, jak śćviardžajecca, raspracavany z ulikam «mižnarodnych standartaŭ u halinie statystyki» i nakiravany na skaračeńnie vydatkaŭ dziaržavy na statystyčnuju vytvorčaść, źnižeńnie vydatkaŭ respandentaŭ na składańnie statystyki.
Dakumientam udakładniajecca paradak raspaŭsiudžvańnia aficyjnaj statystyčnaj infarmacyi. U pryvatnaści, uvodzicca mahčymaść abmiažoŭvać raspaŭsiudžvańnie statystyčnych danych pry pahrozie pryčynieńnia škody nacyjanalnaj biaśpiecy krainy.
Akramia taho, zakonaprajekt aktualizuje pryncypy pryvatnaści pieršasnych statystyčnych danych i suraźmiernaści nahruzki na respandentaŭ, ustanaŭlivaje pierachod u elektronny farmat padačy respandentami pieršasnych statdanych, zamacoŭvaje prava respandentaŭ na pieradaču paŭnamoctvaŭ pa składańni i padačy statdanych na aŭtsorsinh arhanizacyi, zarehistravanaj u Biełarusi.
Taksama respublikanski orhan dziaržaŭnaha kiravańnia ŭ halinie dziaržaŭnaj statystyki i dziaržaŭnyja arhanizacyi, upaŭnavažanyja na viadzieńnie dziaržaŭnaj statystyki, maje prava abmiežavać raspaŭsiudžvańnie i (abo) pradstaŭleńnie stvoranaj imi aficyjnaj statystyčnaj infarmacyi, za vyklučeńniem infarmacyi, dostup da jakoj, raspaŭsiudžvańnie i (abo) pradstaŭleńnie jakoj nie mohuć być abmiežavanyja ŭ adpaviednaści z zakanadaŭčymi aktami, kali jaje raspaŭsiudžvańnie i (abo) pradstaŭleńnie moža nanieści škodu nacyjanalnaj biaśpieki Respubliki Biełaruś, hramadskaha paradku, maralnaści, pravam i zakonnym intaresam jurydyčnych i fizičnych asob.
Što da zakryćcia statystyki, to ŭpieršyniu heta było zroblena ŭzakońvańniem padčac pandemii karanavirusa. Tady spyniłasia publikacyja źviestak pra śmiarotnaść u Biełarusi. Adnak praź niedahlad źviestki byli pieradadzienyja ŭ AAN, u vyniku čaho stała viadoma, što ŭ Biełarusi adbyŭsia adzin z najhoršych skačkoŭ śmiarotnaści ŭ śviecie, što piarečyła aficyjnym rapartam ab pravilnaści stratehii baraćby z kavidam.