Kuleba — partnioram: Nie prapanujcie nam kampramisy z terytaryjalnaj cełasnaściu. Heta buduć i vašyja kampramisy z ułasnaj biaśpiekaj
Zamiest prapanoŭ zaŭčasnych mirnych pieramovaŭ z Rasijaj, jakaja nie imkniecca da mirnaha pracesu, metaj partnioraŭ pavinna być pieramoha Ukrainy, jakaja pryniasie ŭstojlivy i spraviadlivy mir na jeŭrapiejski kantynient. Ab hetym zajaviŭ ministr zamiežnych spraŭ Dźmitryj Kuleba ŭ videazvarocie da ŭdzielnikaŭ jubilejnaha kanhresa Panjeŭrapiejskaha sajuza, jaki prachodzić z nahody 100-hoddzia arhanizacyi ŭ Vienie, paviedamlaje «Jeŭrapiejskaja praŭda».
19.11.2022 / 20:21
«Nam patrebna pieramoha, a nie ničyja. Kali dazvolić Rasii ŭziać zaraz paŭzu, Pucin stvoryć pasiarod Jeŭropy zamarožany kanflikt, hihanckuju bombu zapavolenaha dziejańnia, jakaja budzie hatovaja ŭzarvacca ŭ luby momant. Dla Jeŭropy było b stratehičnaj pamyłkaj pieraśledavać takuju metu. Pieraścierahaju partnioraŭ Ukrainy: nie prapanujcie nam kampramisy z sumleńniem, terytaryjalnaj cełasnaściu abo suvierenitetam. Tamu što heta buduć i vašyja kampramisy z ułasnaj biaśpiekaj», — zajaviŭ jon.
Pa słovach Kuleby, ni adna kraina ŭ śviecie nie imkniecca da miru tak, jak Ukraina, ale «takija vojny, jak hetaja, pavinny zaviaršacca pieramohaj dabra nad złom».
Pa słovach ministra, partnioram zaraz čas pastavić metaj pieramohu Ukrainy i pracavać nad jaje dasiahnieńniem, zamiest taho, kab šukać zaŭčasnych mirnych damoŭlenaściaŭ z Rasijaj, bo Maskva nie źmianiła ŭltymatyŭnaha tonu i vykarystoŭvaje zajavy ab nibyta hatoŭnaści da pieramovaŭ tolki jak prykryćcio dla praciahu ahresii.
«Sapraŭdny mir pryniasie ŭkrainskaja pieramoha. Hetaja meta całkam dasiahalnaja, jak dakazali charkaŭskaja i chiersonskaja apieracyi hetaj vosieńniu. Pieramoha Ukrainy budzie taksama pieramohaj Jeŭropy i Zachadu. Jana adnović mir i biaśpieku na našym kantyniencie na dziesiacihoddzi. Akramia taho, jana pryniasie praciahły pieryjad mižnarodnaj stabilnaści, tamu što stanie vidavočna, što ahresija nie źjaŭlajecca efiektyŭnym instrumientam dasiahnieńnia met u 21 stahoddzi.
Mienavita da takoha vyniku my ŭsie pavinny imknucca, i mienavita heta źjaŭlajecca šlacham da sapraŭdnaha, tryvałaha i spraviadlivaha miru», — padkreśliŭ Dźmitryj Kuleba.