Amierykanski spartyŭny žurnalist pamior padčas matča Niderłandy — Arhiencina ŭ Katary. Jaho brat ličyć heta zabojstvam
Hrant Uoł byŭ adnym z samych viadomych futbolnych žurnalistaŭ u ZŠA. Jon pracavaŭ na vaśmi čempijanatach śvietu.
10.12.2022 / 11:36
Pa słovach reparcioraŭ, jakija siadzieli pobač ź im, Uołu stała drenna padčas dadatkovaha času hulni. Žurnalisty paklikali dapamohu, i rabotniki ekstrannych słužbaŭ prybyli na miesca i pasprabavali akazać jamu pieršuju dapamohu.
Jak vynikaje sa słoŭ arhanizataraŭ turniru, žurnalista adpravili ŭ balnicu, adnak vyratavać jaho nie ŭdałosia. Fiederacyja futboła ZŠA i prezident FIFA Džani Infancina vykazali spačuvańni rodnym i blizkim Hranta Uoła.
Uoł adkryta krytykavaŭ arhanizataraŭ turniru, abvinavačvajučy ŭ abyjakavaści da śmierciaŭ rabočych, jakija pracavali na budaŭnictvie abjektaŭ dla ČS.
U apošnija dni Hrant skardziŭsia na drennaje samaadčuvańnie i dyskamfort u hrudziach. U pačatku turniru Uoła nie puścili na stadyjon u futbołcy ź viasiołkavaj simvolikaj, jakuju jon nadzieŭ u padtrymku ŁHBT, i zatrymali na 25 chvilin. Paźniej FIFA paprasiła ŭ jaho prabačeńnia.
Brat žurnalista Eryk, adkryty hiej, zajaviŭ, što ličyć śmierć Uoła zabojstvam. Pavodle jaho słoŭ, Hrant Uoł raskazvaŭ jamu ab pahrozach.