ЗША дадуць Украіне ракеты далёкасцю да 150 км, але не 300, якія Кіеў даўно просіць
Агенцтва Reuters паведамляе са спасылкай на крыніцы ў кіраўніцтве ЗША, што Злучаныя Штаты ў найбліжэйшы час маюць намер перадаць Украіне ракеты далёкасцю да 150 км.
01.02.2023 / 08:21
Фота: Мінабароны Украіны
Reuters піша, што ў новы пакет вайсковай дапамогі ЗША Украіне ўвойдуць высокадакладныя ракеты малога дыяметра наземнага базіравання (GLSDB).
Гэтыя саманаводныя ракеты амерыкана-шведскай распрацоўкі запускаюцца ў тым ліку з установак HIMARS і могуць паражаць цэлі на адлегласці многіх дзясяткаў кіламетраў.
Да гэтага часу мяжа далёкасці ракет, якія амерыканцы і іншыя саюзнікі пастаўлялі ўкраінскай арміі, складала крыху больш за 80 кіламетраў — гэта таксама ракеты да ўстановак HIMARS.
Украіна даўно просіць у ЗША і саюзнікаў высокадакладныя ракеты АТАСMS далёкасцю да 300 кіламетраў, якімі можна страляць з установак HIMARS. Да гэтага часу заходнія саюзнікі адмаўляліся перадаваць такую зброю — па неафіцыйных звестках, з-за боязі, што ўкраінцы пачнуць біць імі па цэлях у глыбіні расійскай тэрыторыі, а гэта можа прывесці да некантралюемай эскалацыі вайны.
Па звестках Reuters, пра новы пакет вайсковай дапамогі аб'ёмам 2,2 млрд даляраў будзе абвешчана ўжо на гэтым тыдні.