Сыр плюс 40%, грэчка мінус 28%. Як за год змяніліся цэны на базавыя прадукты
Паглядзелі, як з лютага мінулага года змяніліся цэны на базавыя прадукты харчавання.
01.03.2023 / 09:16
Малочныя прадукты
Літр, а дакладней 930 грам, 2-працэнтнага малака «Здравушка» летась каштаваў 1,51 рубля, цяпер — 1,74 (+15,2%).
Кефір «Савушкаў прадукт» тлустасцю 1,5% за год падаражэў на 8,8% і цяпер каштуе 1 рубель 73 капейкі за 950 грам.
Скрыншот сайта edostavka.by па стане на 27.02.2023
Пачак 9-працэнтнага тварагу «Мінская марка» летась прадаваўся за 1,36 рубля, цяпер за 1,76, што складае плюс 29,4% да леташняй цаны.
200 грам сыру «Расійскі» ад «Савушкавага прадукту» год таму можна было набыць за 3,21 рубля, цяпер жа ён прадаецца за 4,5 рубля, ці плюс 40% ад леташняй цаны.
Скрыншот сайта edostavka.by па стане на 27.02.2023
Масла сметанковае «Мінская марка» 72 працэнты тлустасцю ў мінулым лютым каштавала 2,97 рубля, а цяпер — 3,81 рубля (+28%).
На 9,5% падаражэў алей. Бутэлька 770 грам алею «Ураджайны» цяпер прадаецца за 3,78 рубля, а год таму яго можна было набыць за 3,45 рубля.
Кашы
У адрозненне ад малочных прадуктаў, некаторыя крупы ў Беларусі патаннелі. Так, 700 грам грэчневай крупы «Мелькруп» цяпер каштуе 2,29 рубля, калі год таму гэты самы прадукт прадаваўся за 3 рублі 19 капеек. Гэта мінус 28% за год.
Рыс Food collection 600 грам таксама крыху страціў у цане: 1,82 рубля супраць 1,91 рубля годам раней.
А вось аўсяныя шматкі «Экстра №3» у лютым 2022 года каштавалі танней, чым цяпер: 89 капеек супраць 1,16 рубля. Гэта амаль плюс 30% да леташняй цаны.
Скрыншот сайта edostavka.by па стане на 27.02.2023
Таксама вырасла цана на пшанічную муку. Летась кілаграм класічнай «Лідскай мукі» прадаваўся за 1,3 рубля, а цяпер — за 1,5 рубля. За год яна прыбавіла ў цане 15,4%.
Каўбасы і сасіскі
Упакоўка «Доктарскай» каўбасы ад Гродзенскага мясакамбіната вагой 400 грам летась прадавалася за 3,49 рубля, а цяпер за 4 рублі 40 капеек. Гэта плюс 26% за год.
На 9,1% падаражэлі сасіскі «Малочныя» ад Брэсцкага мясакамбіната. Летась пачак 390 грам каштаваў 4,06 рубля, а цяпер 4,43 рубля.
*Усе цэны па стане на люты 2022 і люты 2023 года ўзяты з сайта edostavka.by.