Ci moža dyviersija z A-50 rastapić lod pamiž Kijevam i Ofisam Cichanoŭskaj?
Učora rasijski samalot A-50, vierahodna, palacieŭ na ramont u Rasiju. Ale nakolki jon byŭ paškodžany, pakul nie jasna. Ci daje dyviersija ŭ Mačuliščach šaniec na palapšeńnie stasunkaŭ pamiž ukrainskim kiraŭnictvam i Ofisam Cichanoŭskaj? Razvažajuć dyrektar ukrainskaha Instytuta suśvietnaj palityki Jaŭhien Mahda i palityčny ahladalnik «Radyjo Svaboda» Juryj Drakachrust.
03.03.2023 / 11:12
Fota: Ofis Cichanoŭskaj
«Adlot A-50 daje efiekt «rassłajeńnia sihnału»
Situacyja vakoł samalota A-50 ciapier nieadnaznačnaja, zaŭvažaje Jaŭhien Mahda.
«Zajava spadara Azarava, što heta sprava ruk biełaruskich partyzan, usprymałasia dosyć adnaznačna: paśpiachovaja ataka biełaruskaha padpołla, samalot vyviedzieny sa stroju. Ale siońnia my ŭbačyli, što jon padniaŭsia ŭ pavietra i pakinuŭ terytoryju Biełarusi. Heta taksama, jak ja razumieju, vialiki pazityŭ, bo adpraviŭsia jon dla vypraŭleńnia paškodžańniaŭ na avijaramontny zavod.
Ale skłałasia situacyja, u jakoj nie bačna adnaznačnaści pośpiechu: sam fakt adlotu samalota vyklikaje roznahałossi ŭ infarmacyjnaj prastory i efiekt «rassłajeńnia sihnału». A tak jak ukrainskaja ŭłada nie haryć žadańniem stasavacca z Ofisam Śviatłany Cichanoŭskaj, to jana vykarystaje hety adlot A-50 dla pacvierdžańnia svajoj pazicyi: ci to ŭ vas niešta atrymałasia, ci to nie atrymałasia», — miarkuje ekśpiert.
Paŭstaje pytańnie: a ci byŭ šaniec na paciapleńnie hetych adnosin u pryncypie? Redaktar jeŭrapiejskaha biuro «Radyjo Svaboda» Rykard Joźviak śćviardžaŭ, što Ukraina adyhrała važnuju rolu ŭ tym, što JeS nie ŭvodziŭ sankcyi suprać Minska ŭ apošnija miesiacy.
«Nie tolki Ukraina moža ŭpłyvać na Jeŭrapiejski Sajuz pa pytańni sankcyj da Biełarusi. Darečy, pra heta kaža i sam Joźviak u intervju. Ukraina nie zjaŭlajecca siabram Jeŭrapiejskaha Sajuza, ale jość dziaržavy — čalcy JeS, jakija taksama zacikaŭlenyja ŭ biełaruskim eksparcie kalijnych uhnajeńniaŭ. I ŭ tym niama ničoha dziŭnaha, bo u mnohich dziaržaŭ jość svaje nacyjanalnyja intaresy, achviaravać jakimi dziela roskvitu Ukrainy ci taho, kab zahnać Biełaruś u hłuchi vuhał, nichto nie stanie», — padkreśliŭ ukrainski analityk.
Dron padčas raźviedki padlataje da A-50. Skryn videa jutub-kanała «Bajpoł»
Na jaho dumku, u intaresach Ukrainy vieści pieramovy z usimi ŭdzielnikami biełaruskaha demakratyčnaha pracesu (budź to Ofis ci połk Kalinoŭskaha), a Łukašenku papiaredzić, što biznesu bolej nie budzie.
«Zonaj vyklučna jaho adkaznaści stanie rašeńnie — kidać ci nie biełaruskich vajskoŭcaŭ u topku vajny va Ukrainie. Ale pakul hetaha nie adbyłosia, pakul Biełaruś nie stała ŭdzielnicaj poŭnamaštabnaha ŭvarvańnia Rasii, u nas jość šaniec na dyjałoh. Ale ŭ hetym dyjałohu nie pavinna być bačna navat končyka vusa Łukašenki», — kaža Jaŭhien Mahda.
«Što zmoža prapanavać Cichanoŭskaja, kali Zialenski sustreniecca ź joj?»
Palityčny ahladalnik Juryj Drakachrust ličyć, što palapšeńnie stasunkaŭ pamiž aficyjnym Kijevam i Ofisam Cichanoŭskaj chutčej niemahčyma, čym vierahodna.
«Kali biełaruskaje vojska ŭstupić u vajnu, tady mahčyma ŭsio — ažno da pryznańnia biełaruskaha ŭradu ŭ vyhnańni. U takim vypadku Ukraina ničoha nie hublaje.
Tady, kaniešnie, mahčymy lubyja kambinacyi, u tym liku i z udziełam pałka Kalinoŭskaha — my zaraz nazirajem zalacańni da hetaj struktury. Ale ja nie vyklučaju, što tady ŭzrovień kantaktaŭ z Ofsisam Cichanoŭskaj, z Pierachodnym kabinietam stanie vyšejšym», — kaža analityk.
Adnak pakul ukrainskija ŭłady trymajucca na dystancyi ad Ofisa Cichanoŭskaj.
«Hruba kažučy, ukrainskaje kiraŭnictva apasajecca, što kali sustreniecca z Cichanoŭskaj, Łukašenka razzłujecca i pašle vojski. A što zmoža prapanavać Cichanoŭskaja, kali Zialenski sustreniecca ź joj?»
Juryj Drakachrust miarkuje, što z nastupleńniem viasny pahroza adkryćcia «biełaruskaha frontu» adciahvajecca ŭ časie, tamu Kijeŭ nie zrobić nivodnaha nieaściarožnaha kroku.
«Imaviernaść adkryćcia druhoha, biełaruskaha, frontu adkładvajecca prynamsi da leta, a moža — i da vosieni. Pierad vajnoj kamandujučy USU Valeryj Załužny pisaŭ, što ŭ lutym mahčyma nastup z Biełarusi. Luty prajšoŭ, nastupu niama. Dyk navošta tady ŭkraincam padšturchoŭvać Łukašenku da ŭdziełu ŭ vajnie? Arastovič, naprykład, naŭprost havoryć: Zialenski sustreniecca z Cichanoŭskaj, a Łukašenka pašle vojski. I kamu ad hetaha budzie dobra? Ukraincam nie budzie».