Украінскі бок расказаў аб расследаванні смерці байца ТРА на мяжы з Беларуссю. У яго смерці вінавацілі і беларускі бок
33-гадовы баец украінскай тэрытарыяльнай абароны Сяргей Панасюк загінуў 25 лютага падчас выканання баявога задання. Трагедыя адбылася на назіральным посце ўкраінска-беларускай мяжы. Родныя вайскоўца лічаць, што яго забілі стрэлам з беларускага боку. Украінскі бок распавёў пра першыя вынікі расследавання.
23.03.2023 / 14:21
Сяргей Панасюк. Фота: з сямейнага альбому
Следствам устаноўлена, што здарэнне адбылося 25 лютага каля 02:00 паблізу вёскі Тур Ковельского раёна Валынскай вобласці.
«Вайскоўцы пад камандаваннем камандзіра адкрылі агонь па цэлі пасля атрымання паведамлення аб зʼяўленні невядомых асоб у раёне мяжы Украіны з Беларуссю»,
— паведаміў дырэктар тэрытарыяльнага ўпраўлення Дзяржаўнага бюро расследаванняў (ДБР) у Львове Руслан Ляшко.
У выніку адзін з вайскоўцаў быў паранены і памёр падчас транспарціроўкі.
У ДБР адзначылі, што ўжо дапытаныя ўсе сведкі, расследаванне працягваецца. У цяперашні час прызначаныя экспертызы, па выніках якіх будуць устаноўлены абставіны здарэння.
З пачатку поўнамаштабнага ўварвання Расеі гэта адзіная крымінальная вытворчасць у Львоўскім упраўленні СКБ аб парушэнні правілаў нясення баявога дзяжурства.
Больш падрабязна пра расследаванне гібелі салдата ў Бюро не паведамляюць, спасылаючыся на таямніцу следства.
«Іншыя звесткі ўтрымліваюць тайну дасудовага расследавання, і ў мэтах забеспячэння інтарэсаў следства доступ да іх абмежаваны», — гаворыцца ў адказе.
- 27 лютага стала вядома, што на ўкраінска-беларускай мяжы падчас выканання баявога задання загінуў 33-гадовы вайсковец тэраабароны Валыні Сяргей Панасюк.
- Сяргей Панасюк быў удзельнікам АТА. У рады тэраабароны стаў у першыя дні поўнамаштабнага ўварвання. Быў камандзірам стралковага ўзвода. У яго засталіся дачка і сын.
- У сацсетках зʼявілася неправераная інфармацыя пра нібыта абстрэл з боку Беларусі. Родныя вайскоўца таксама лічаць, што яго забілі стрэлам з беларускага боку. Памежны камітэт РБ адмаўляў, што з іх боку вялася стральба.