Палітвязня Мікалая Клімовіча пахаваюць 12 мая на пінскіх могілках
Цела Мікалая Клімовіча прывязуць у Пінск з Віцебска 11 мая, даведаўся ад сваёй крыніцы тэлеграм-канал «Позірк».
10.05.2023 / 19:18
На наступны дзень запланаванае развітанне з палітвязнем каля ягонага дома, а 14-й гадзіне — пахаванне на могілках «Таргошыцы».
Пра смерць 61-гадовага Мікалая Клімовіча стала вядома 7 мая. Незадоўга перад гэтым ён быў этапаваны ў Віцебскую калонію, дзе пражыў усяго пару тыдняў.
Сёлета 28 лютага суд Пінскага раёна і Пінска прыгаварыў Клімовіча да 1 года калоніі за «абразу» Аляксандра Лукашэнкі. Ён паставіў знак «смешна» пад малюнкам, на якім Лукашэнка і Уладзімір Пуцін былі ў нацысцкай форме.
Мікалай Клімовіч перанёс інсульт і складаную аперацыю на сэрцы і перад прысудам сказаў: «Любое турэмнае знявольванне для мяне — гэта смерць, таму што я павінен быць пад сталым наглядам урача, прымаць вялікую колькасць моцных лекаў. Я магу не вытрымаць нават месяца».