Łukašenka pryjechaŭ u «lečkamisiju»
Pavodle infarmacyi kanała «MatolkaPamažy», siońnia ŭ rajonie 19:00 Łukašenka pryjechaŭ u «Respublikanski kliničny miedycynski centr», jaki znachodzicca na bierazie vadaschovišča Drazdy. Hetuju ž infarmacyju pacviardžaje i «Jeŭraradyjo» sa spasyłkaj na svaich čytačoŭ.
13.05.2023 / 20:30
Paviedamlajecca, što ŭ momant jaho pryjezdu padjezdy da balnicy byli pierakrytyja, a ŭzdoŭž daroh stajali siłaviki. Paśla prajezdu kartežu Łukašenki ŭsie prajezdy adkryli.
Apošni tydzień Łukašenka jaŭna maje niejkija prablemy sa zdaroŭjem. 5 maja, uručajučy ŭznaharody pradstaŭnikam represiŭnaha aparatu, jon byŭ asipły. Paśla ž vymušany byŭ asabista naviedać parad u Maskvie 9 maja, vyhladaŭ vielmi kiepska i nie zmoh navat prajści samastojna 300 mietraŭ razam z Pucinym i inšymi jaho haściami z Krasnaj płoščy da Alaksandraŭskaha sada. Uviečary jon jašče zmoh paprysutničać na ŭskładańni kvietak na płoščy Pieramohi ŭ Minsku, ale ŭračystuju pramovu havaryŭ za jaho ministr abarony Viktar Chrenin. Paśla taho na publicy Łukašenka nie źjaŭlaŭsia, mierapryjemstvy ź jaho udziełam byli admienienyja.
U toj ža čas aficyjna pra jaho chvarobu ničoha nie paviedamlałasia. Prapahanda nijak nie kamientavała źniknieńnie Łukašenki i jaho chvaravity vyhlad. Pres-słužba Łukašenki, jakaja viadzie kanał «Puł pieršaha», apošnija dni publikuje abstraktnyja rečy, nie pakazvajučy svajho načalnika. Naturalna, heta nie moža nie sparadžać raznastajnych čutak.
Čytajcie taksama:
Łukašenka nie vystupiŭ z pramovaj na płoščy Pieramohi ŭpieršyniu za čas svajho kiravańnia