Да Мінскага мора пабудуюць ад МКАДа веладарожку
У Мінскім раёне адно з самых папулярных месцаў адпачынку — Мінскае мора, або Заслаўскае вадасховішча. Ступень яго гатоўнасці ацаніў у чацвер старшыня Мінскага аблвыканкама Аляксандр Турчын. Разам з міністрам унутраных спраў Іванам Кубраковым і мэрам Мінска Уладзімірам Кухаравым ён наведаў пляж №5 — адзін з самых папулярных пяшчаных пляжаў Заслаўскага вадасховішча.
02.06.2023 / 14:03
Фота: Мінская праўда
Месца сустрэчы: экалагічная сцежка, якая пачынаецца каля аўтобуснага прыпынку і вядзе акурат да пляжу №5 Заслаўскага вадасховішча, піша «Мінская праўда».
Летась Мінская абласная Дзяржаўтаінспекцыя і «Мінская лесапаркавая гаспадарка» стварылі гэтую лясную сцежку працягласцю 600 метраў. У самым яе пачатку ўстаноўлена дэкаратыўная шыльда: зручны арыенцір для наведвальнікаў пляжу!
Фота: Мінская праўда
— У тых, хто дабіраецца да пятага пляжу на аўтобусе, праблем не ўзнікае. Ёсць добраўпарадкаваная сцежка, для выгодаў адпачывальнікаў — лаўкі. Пляж №5 — самы модны. Сюды едуць жыхары Мінска, найбліжэйшых раёнаў. У пікавы перыяд прыязджае каля 2600 машын, тады як існуючыя стаянкі разлічаны амаль на 1000 месцаў. Паркоўкі запаўняюцца і ўзнікае затор, які цягнецца да Ждановічаў, — увёў у курс справы начальнік УУС Мінаблвыканкама Аляксандр Астрэйка.
Фота: Мінская праўда
Рашэнне праблемы ёсць: у пікавы перыяд адкрываць для выезду машын тэхналагічны праезд, які ідзе паралельна экасцежцы. А дарога, якая вядзе да пляжу, на гэты час будзе аднабаковай.
Уладзімір Кухараў. Фота: Мінская праўда
— Але гэта толькі ў перыяд наплыву адпачывальнікаў. У звычайныя дні тэхналагічную дарогу закрыюць на шлагбаўм. А дарога да пляжу будзе двухбаковай, — удакладніў Аляксандр Астрэйка.
Фота: Мінская праўда
На канец лета запланавана рэалізацыя яшчэ аднаго праекта: будаўніцтва вялікага разваротнага кальца і ўстаноўка пры ўездзе на паркоўку шлагбаума. Пасля таго як усе месцы на стаянцы запоўняцца, шлагбаум для ўезду закрыюць. Машыны будуць паркавацца ўздоўж дарогі.
Аляксандр Турчын. Фота: Мінская праўда
Як адзначыў Аляксандр Турчын, таксама ў планах — будаўніцтва веладарожкі і пешаходнай дарожкі ад кальцавой дарогі праз Ждановічы. Гэта будзе зроблена для зручнасці беларусаў, якія карыстаюцца велатранспартам.
Іван Кубракоў. Фота: Мінская праўда
Аляксандр Турчын і Іван Кубракоў азнаёміліся таксама з найноўшымі сродкамі патрулявання пляжаў. На ўзбраенні міліцыі — дроны і электрасамакаты, забяспечаныя вогнетушыцелем, аптэчкай, вадой.
Дрон і самакаты будуць выкарыстоўвацца для адсочвання сітуацыі на ўсіх пляжах Заслаўскага вадасховішча.
Фота: Мінская праўда