Prahladzieŭ film «Hienerał niaskončanaj vajny» pra S. Bułaka-Bałachoviča

Film zrobleny dobra, na ŭpeŭnienuju «čaćviorku», ale atrymaŭsia zanadta patetyčny dla takoj nieadnaznačnaj asoby.

31.03.2010 / 13:13

Pahladzieŭ biełsataŭski film pra hienerała Bułaka-Bałachoviča — «Hienierał niaskončanaj vajny».

Nia budzie lišnim skazać, što Stanisłaŭ Bułak-Bałachovič — ci nie adziny vybitny biełaruski vajskoviec 20-ha stahodździa i toj čałaviek, z kim mahli być źviazanyja badaj što najbolš realnyja spadziavańni na niezaležnaść Biełarusi ŭ toj čas. Kansalidacyja niezaležnickich siłaŭ vakoł Bałachoviča, utvareńnie biełaruskaj dziaržavy ŭ źviazie z Polščaj pad jaho dyktaturaj — taki scenar možna sabie ŭjavić. Ale što ŭ 1920-ch, što ŭ 2010-ch, biełaruski nacyjanalny ruch maje adnyja i tyja ž prablemy.

Čamuś u filmie nie razhladajecca najbolš sprečny epizod z historyi armii Bałachoviča, a mienavita «habrejskaje pytańnie»: z adnaho boku habrejskija pahromy, jakija niby ładzili jahonyja žaŭniery, i z druhoha boku habrejski atrad, jaki nibyta byŭ u składzie jaho vojska. Tak ci inačaj, vielmi nie chapaje kankretna vykazanaj pa hetym pazycyi.

Nie chapaje taksama krytyki Bałachoviča z boku ŭradu BNR, tolki mimachodam pryvodzicca vykazvańnie samoha Bułaka-Bałachoviča, što tak i nie atrymałasia damovicca ab dapamozie z kiraŭnictvam Słuckaha zbrojnaha čynu.

Film zrobleny jakasna, na ŭpeŭnienuju «čaćviorku». Nakolki razumieju, u filmie ŭpieršyniu publikujecca znojdzienaja ŭ Estonii kinachronika tych časoŭ, na jakoj bačym Bułaka-Bałachoviča i jaho žaŭnieraŭ.

Ale ž dla takoj dosyć nieadnaznačnaj fihury film atrymaŭsia, zdajecca, usio ž dosyć patetyčnym. Chacia napeŭna ž i ŭ Polščy zdymajucca patryjatyčnyja filmy pra toj čas, dzie aŭtary nia nadta pierajmajucca nakont Sanacyi, represij suprać inšadumcaŭ i turmy ŭ Biarozie-Kartuskaj. Jak i ŭ Rasiei časta padajuć vyklučna stanoŭčy vobraz ŚMIERŠ i maršała Žukava ci va Ŭkrainie — Ściapana Bandery. Pytańnie ŭ tym, ci varta nam takimi ž metadami stvarać sabie nacyjanalnyja mity i nacyjanalnych hierojaŭ. Chacia chiba ž jość inšyja metady dla hetaha?

Film jość na torentach, u Vkontaktie i na sajcie Biełsata:

http://www.belsat.eu/generator.php?p=1,10,14,18,5619&show=tak

Aleś Čajčyc