Гей‑прайд у Мінску будзе, але дзе — сакрэт

14.05.2010 / 17:10

Забароненае ўладамі шэсце «Славянскага гей-прайду 2010» усё ж такі адбудзецца 15 мая. На прэс-канферэнцыі арганізатары сказалі, што час і месца правядзення мерапрыемства будзе удакладняцца заўтра.

Стоадсоткава пакуль вядома толькі, што шэсце адбудзецца ў Мінску, у межах кальцавой. І не варта чакаць натоўпу геяў і лесбіянак на вуліцах горада, насамрэч не так многа асобаў нетрадыцыйнай полавай арыентацыі гатовыя сёння рызыкнуць працай, навучаннем і становішчам у грамадстве. Арганізатары гей-прайда добра разумеюць, што далёка не кожны гей выйдзе на шэсце нягледзячы на рызыку быць пабітым ці затрыманым.

«У Беларусі заўтра унікальная магчымасць паказаць Еўропе, што ўсе чуткі пра недэмакратычнасць вашай краіны моцна перабольшаны. — гаворыць падчас прэс-канферэнцыі Нікалай Алексееў, адзін з арганізатараў Славянскага гей-прайда ў Мінску. — Мы не збіраемся эпатаваць публіку, не збіраемся ладзіць эратычныя шоў ці займацца сэксам на вуліцах. Аднак патрэбна разумець, што гей-прайд — гэта радыкальная мера прынятая ад адчаю, каб журналісты і грамадства звярнулі ўвагу на праблемы ЛГБТ-супольнасці. Гей-прайд не ёсць мэтай, гэта сродак барацьбы за нашыя правы».

Сёння адбудзецца адкрыццё гей-прайду і паказ фільму «Beyond Gay Theatrical Trailer».

Настасся Шамрэй