Raskryvajecca adna z kryvavych tajamnic 1991 hoda
Siem litoŭskich mytnikaŭ byli zabityja ryžskimi amonaŭcami. Pačaŭsia sud nad adnym ź ich.
01.04.2011 / 16:55
Siem litoŭskich mytnikaŭ byli zabityja ryžskimi amonaŭcami. Pačaŭsia sud nad adnym ź ich.
Hety były amonaviec, mahčyma, ździejśniŭ zabojstva siami litoŭcaŭ.
Litoŭskija śledčyja pieradali ŭ sud spravu pieršaha zatrymanaha pa abvinavačvańni ŭ zabojstvie siami litoŭskich mytnikaŭ. Jano było ździejśnienaje ŭ 1991 hodzie, napiaredadni putču. Žachlivaja raźnia maładzieńkich mytnikaŭ, što padparadkoŭvalisia Vilni, a nie Maskvie, žachnuła biełaruska-litoŭskaje pamiežža.
30 sakavika na pasiadžeńni Vilenskaha akruhovaha suda prakuror litoŭskaj Hienprakuratury Rałandas Stankiavičus skazaŭ, što były amonaviec Kanstancin Michajłaŭ (novaje proźvišča, raniej jon nasiŭ proźvišča Nikulin) ździejśniŭ złačynstva pa 2 i 5 punktach 129 art. Kryminalnaha kodeksa — zabojstva dvuch i bolš asob, jakija znachodzilisia pry vykanańni słužbovych abaviazkaŭ.
Pa słovach prakurora, dla zabojstva miednickich pamiežnikaŭ sfarmavali hrupu z troch ryžan, u skład jakoj uvachodzili Michajłaŭ, Andrej Łaktyjonaŭ i Alaksandr Ryžoŭ. Zahad ździejśnić złačynstva addaŭ Česłaŭ Młyńnik.
Stankiavičus śćviardžaje, što da 23 hadzin Młyńnik abraŭ troch zhadanych «amapaŭcaŭ». Im byŭ addadzieny zahad jechać pad Miedniki (pa-litoŭsku Miedzininkaj) i zabić pahraničnikaŭ. Sam Młyńnik źjechaŭ u Ryhu.
Michajłaŭ z Ryžovym i Łaktyjonavym, sa słovaŭ prakurora, adbyli ŭ Miedniki apoŭnačy. Ich vioz na miesca «amapaviec» Tadevuš Hudaniec i jašče adzin vilenski «amapaviec». Pa słovach prakurora, napad byŭ ździejśnieny a 4–5-j uranicy, kali na trasie amal niama ruchu.
Pa słovach prakurora, Michajłaŭ chacieŭ zapałochać Juzasa Janonisa i Alhirdasa Kazłaŭskasa, jakija znachodzilisia ŭ 50 mietrach ad pasta, tamu streliŭ u aŭtamabil, u jakim siadzieŭ Janonis. Dźvie kuli patrapili Janonisu ŭ žyvot.
Tym časam Łaktyjonaŭ i Ryžoŭ zatrymali pakinutych šaściarych pamiežnikaŭ, jakija padzialilisia na dźvie hrupy: adna znachodziłasia ŭ vahonie, inšaja — pobač ź im.
Pamiežnikaŭ zahnali ŭ vahončyk, jaki znachodziŭsia na paście, tam u ich strelali nie mienš za 13 razoŭ. Pa słovach Stankiavičusa, stralali ŭ hałovy.
Pamiežniki Antanas Muściejkis, Stanisłovas Arłavičus, słužačyja Alhimantas Juozakas, Mindoŭh Bałavakas, rabotniki DAI Juozas Janonis i Alhirdas Kazłaŭskas zahinuli na miescy.
2 žniŭnia ŭ špitali pamior ciažkaparanieny milicyjant Ryčardas Rabavičus. U žyvych zastaŭsia tolki ciažkaparanieny mytnik Tomas Šarnas.
Michajłaŭ pakul źjaŭlajecca adzinym padazravanym, jaki paŭstaŭ pierad sudom. Inšych padazravanych Rasija admaŭlajecca vydavać.
Jon byŭ zatrymany ŭ 2007 hodzie ŭ Łatvii i pieradadzieny Litvie. Z tych časoŭ Michajłaŭ znachodzicca pad vartaj.
Kala vilenskaj trasy pad Miednikami dahetul staić vahončyk, jaki staŭ muziejem.