Pieratrus u aŭtobusie pilihrymaŭ
U vyniku piacihadzinnaj zatrymki i pieratrusu byli vyjaŭlenyja i skanfiskavanyja niekalki asobnikaŭ «Našaj Nivy». Kanfiskat pieradali ŭ prakuraturu dla daśledavańnia na pradmiet utrymańnia ŭ materyjałach infarmacyi «antydziaržaŭnaha źmiestu».
04.01.2007 / 12:15
Viečaram 3 studzienia na mytni ŭ Bieraści byŭ zatrymany aŭtobus z chryścijanskaj moładździu. Pamiežniki praviali pieratrus u aŭtobusie, dahledzieli asabistyja rečy, uziali tłumačeńni va ŭdzielnikaŭ pilihrymki. Na Viktara Siańko, jaki mieŭ niekalkich asobnikaŭ hazety «Naša Niva», byŭ składzieny pratakoł. Hazety ž skanfiskavali j pieradali ŭ prakuraturu dla daśledavańnia na pradmiet utrymańnia ŭ materyjałach infarmacyi «antydziaržaŭnaha źmiestu». Aŭtobus, u jakim było bolš za 40 čałaviek, trymali na miažy amal 5 hadzinaŭ.
Maładyja biełaruskija chryścijanie — kataliki i vierniki evanhielskich cerkvaŭ — viartałasia ź pilihrymki ŭ charvacki Zahrab, dzie brali ŭdzieł u eŭrapiejskaj ekumeničnaj sustrečy. Sustreču ładziła suśvietna viadomaja chryścijanskaja supolnaść «Teze».
«Prahladali ŭsio, što tolki možna: noty, Biblii, knihi, sšytki, fatazdymki, – havoryć Dzianis Sadoŭski, udzielnik pilihrymki. — Ja rasceńvaju heta jak cisk na maładych aktyŭnych chryścijanaŭ. Vidavočna, pieradvybarčy čas pravakuje takija nieadekvatnyja dziejańni. Jość padstavy mierkavać, što na miažy nas čakali i ŭsio heta było splanavana.»