КДБ выкрыў чарговага шпіёна
Гэта другая справа за месяц. Гэтым разам затрыманы 28-гадовы жыхар Брэста.
13.08.2012 / 11:13
Як паведаміла прэс-служба КДБ, супрацоўнікі іх ведамства па Брэсцкай вобласці затрымалі 28-гадовага жыхара Брэста.
Яго затрымалі пры спробе збору інфармацыі пра грамадзян Беларусі «па заданні замежнай спецслужбы».
Цяпер мужчына знаходзіцца ў СІЗА. У адносінах да яго заведзена крымінальная справа па арт. 356-1 КК РБ «Устанаўленне супрацоўніцтва са спецслужбай, органам бяспекі альбо разведорганам замежнай дзяржавы на канфідэнцыйнай аснове пры адсутнасці прыкметаў здрады радзіме». Пакаранне прадугледжваецца ў выглядзе пазбаўлення волі на тэрмін да 2 гадоў.
«Часта замразведкамі выкарыстоўваюцца жорсткія метады працы, у сувязі з чым нашыя грамадзяне могуць трапіць у безвыходную кампраметуючую сітуацыю. Менавіта таму заканадаўствам прадугледжана вызваленне ад крымінальнай адказнасці асобаў, якія своечасова звярнуліся ў органы дзяржаўнай бяспекі з інфармацыяй пра прыцягненне іх да супрацоўніцтва замежнымі спецслужбамі»,
— заявілі ў КДБ.
12 ліпеня КДБ паведаміў, што спыніў шпіёнскую дзейнасць беларускіх грамадзян, якая ажыццяўляецца ў інтарэсах спецслужбаў Літвы. МЗС Літвы такую інфармацыю адмаўляе. Заявіў, што нічога такога не было і намякнуў, што гэта піяр.