Uciekačy-prapahandysty z «SaŭBielii» zasnavali ekanamičnaje infarmahienctva

Iryna Juzvak, Vital Valaniuk, Ihar Kolčanka syšli z haziety padčas ekanamičnaha kryzisu.

02.10.2012 / 11:50

U biełaruskim internecie zapracavaŭ novy partał ekanamičnaj infarmacyi «Biznes-naviny». «Heta niezaležnaja biełaruskaja kampanija, … misija jakoj zabiaśpiečvać biznes… maksimalna poŭnaj dakładnaj i aktualnaj infarmacyjaj z Biełarusi», — adznačajuć stvaralniki sajta.

«U svajoj dziejnaści redakcyja infarmacyjna-analityčnaha ahienctva „Biznes-naviny“ palityčna niejtralnaja. My taksama nie akazvajem ideałahičnuju padtrymku kamu b ni było», —

Adnak jašče hod tamu kiraŭnictva ahienctva akazvała tuju samuju «ideałahičnuju padtrymku» biełaruskim uładam. «Biznes-naviny stvoranyja byłymi top-žurnalistami «Savieckaj Biełarusii». Dyrektarka — Iryna Juzvak, hałoŭny redaktar — Vital Valaniuk. Siarod supracoŭnikaŭ — Ihar Kolčanka.

Kolčanka pracavaŭ u «SB» ažno z 2002 hoda. Doŭhi čas jon byŭ hałoŭnym palityčnym ahladalnikam i navat supravadžaŭ u pajezdkach Alaksandra Łukašenku. Da kanca 2011 hoda pad jahonym aŭtarstvam vyjšła bolš za 1500 materyjałaŭ Nakštałt «Narod zaŭsiody maje racyju. A jak inačaj» paśla vybaraŭ 2006 hoda ci «Vybar zrobleny! Idziom dalej» u 2010 hodzie.

Iryna Juzvak śpiecyjalizavałasia na ekanomicy, ale nie admaŭlałasia prajścisia mocnym słovam i pa lidarach apazicyi.

Aboje jany syšli z haziety ŭ kancy 2011 hoda, kali zarobki ŭ dziaržaŭnych hazietach apuścilisia na dno.

Vital Valaniuk pratrymaŭsia ŭ haziecie na niekalki miesiacaŭ bolš. Apošni čas pracy ŭ «SB» jon taksama supravadžaŭ Łukašenku ŭ pajezdkach. U haziecie ž jon drukavaŭsia z 2005 hoda, paśpieŭšy apublikavać kala 1000 materyjałaŭ. Na pres-kanfierencyi ŭ kancy 2011 hoda jon spytaŭ u Łukašenki, ci nie dumaje toj, što varta vypuścić palitviaźniaŭ, jak taho prosić Jeŭrasajuz. Kiraŭnik dziaržavy byŭ vidavočna ździŭleny takomu pytańniu. Łukašenka pieravioŭ temu na inšaje: «Što vy atrymajecie ad hetych adnosinaŭ? Ja budu ci nie budu raz’iazžać pa jeŭrapiejskich dziaržavach. Vy taksama… Darečy, vy vyjazny?» Valaniuk akazaŭsia vyjazny, i praz niekatory čas pierajšoŭ pracavać na tut.by.

Ciapier bryhada prapahandystaŭ znoŭ uz’iadnałasia.

Nashaniva.com