Вялікі францускі актор завяршае кар’еру. Як жа хутка чалавек старэе… Як шмат ён пасьпявае зрабіць!
У мінулую нядзелю, на здымках карціны «Мішу д’Абэр», зорка францускага кіно Жэрар Дэпард’ё абвясьціў, што завяршае акторскую кар’еру. «Я зьняўся ў 170 карцінах, — сказаў 56-гадовы актор, — мне няма чаго больш даказваць. Я не зьбіраюся чапляцца, як дурань».
Дэпард’ё нарадзіўся ў 1948 г. у Шатару (Цэнтральная Францыя) у шматдзетнай сям’і. Ягонымі ўнівэрсытэтамі была вуліца: Жэрар займаўся рабаўніцтвам, выпіваў, раз нават трапіў на бальнічны ложак. Але аднойчы разам зь сябрам сабраўся і паехаў у Парыж, каб стаць акторам. У аматарскай трупе «Кафэ дэ ля Гар» Дэпард’ё быў і выканаўцам, і рэжысэрам, і аўтарам спэктакляў. Маленькі тэатар стаў вядомы ўсяму Парыжу.
У 1974 г. Бэртран Бліе запрасіў Дэпард’ё на карціну «Вальс». Фільм стаўся самай скандальнай кінападзеяй году.
Неўзабаве моцны, упэўнены ў сабе Дэпард’ё склаў камічны дуэт з П’ерам Рышарам.
Яму асабліва добра атрымліваліся ролі людзей з народу. Так у эпасе Б.Бэрталючы «ХХ стагодзьдзе» ён сыграў селяніна-бунтаўшчыка, у карціне «Жэрміналь» — гарняка. Вялізнае аблічча цельпукаватага актора кантраставала з «духоўнымі» ролямі і дадавала ім нечаканай глыбіні: у карціне Марыса П’яла «Пад сонцам Сатаны» Дэпард’ё стаўся сьвятаром, а сыграны акторам Сырано дэ Бэржэрак прызнаны недасягальным узорам.
Гальскі тэмпэрамэнт актора захоўваўся і ў міжнародных пастаноўках, як роля Калюмба ў фільме «1492: пакарэньне раю». Нават у ролі прывіда — былі і такія! — Дэпард’ё напіваецца, скандаліць, б’ецца — і дэманструе грунтоўны псыхалягізм («Простая фармальнасьць»).
Скандалы суправаджаюць Дэпард’ё і ў жыцьці: так, кавалер ордэну Ганаровага легіёну ў тэлеперадачы назваў аднаго з крытыкаў «ідыётам, крэтынам і паўдуркам». Але за грубасьцю хаваецца незвычайная духоўная сіла і нават безабароннасьць.
Нягледзячы на заявы аб сыходзе, знаёмыя актору не паверылі. «Я чую такія заявы дзесяць гадоў і ня веру ім ані», — заявіў асабісты агент Дэпард’ё. Зрэшты, нават калі актор завяжа з кіно, ён мае чым заняцца — Дэпард’ё займаецца вінаградарствам.
