«Залаты глобус»: «Арго» і «Адрынутыя» — найлепшыя фільмы

Фільм «Арго» распавядае пра падзеі Іранскай рэвалюцыі 1979 г. На фота - прадзюсары фільма: Бэн Афлек (рэжысёр), Грант Хеслоў і Джордж Клуні.

Трылер Бэна Афлека «Арго» перамог у намінацыі «Найлепшы фільм (драма)» на 70-й цырымоніі ўручэння ўзнагародаў «Залаты глобус» у ЗША. У аналагічнай намінацыі для камедый і мюзіклаў перамог музычны фільм «Адрынутыя».

У намінацыі «Найлепшая мужчынская роля (драма)» быў адзначаны Дэніэл Дэй-Люіс, які сыграў 16-га прэзідэнта ЗША ў фільме «Лінкольн».

Узнагароду ў намінацыі «Найлепшая жаночая роля (драма)» атрымала Джэсіка Чэстейн, якая сыграла галоўную гераіню ў фільме Кэтрын Бігелоў «Мэта нумар адзін».

Аўстралійскі акцёр Х’ю Джэкман, які сыграў галоўную ролю ў «Адрынутыя», атрымаў статуэтку ў намінацыі «Найлепшая мужчынская роля (камедыя ці мюзікл)».

За найлепшую жаночую ролю ў камедыі або мюзікле выйграла ўзнагароду 22-гадовая актрыса Джэніфер Лоўрэнс, якая выканала ролю маладой удавы ў фільме «Мой хлопец — псіх».

Бі-Бі-Сі

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ