Паводле словаў выканаўчага дырэктара грамадзкага аб’яднаньня «Беларускі Хэльсінскі камітэт» Алега Гулака, на гутарку ў менскую гарадзкую пракуратуру выклікалі дзьвюх дзяўчат. Яны адразу зьвярнуліся па дапамогу ў БХК, і на гутарцы ў пракуратуры прысутнічалі Алег Гулак і праваабаронца Тацяна Гацура.
Паводле сп. Гулака, у дзяўчат распытвалі аб працы сайту руху, цікавіліся пра інфармацыю, разьмешчаную на яго старонках. А. Гулак паведаміў таксама, што справа відавочна ініцыяваная Камітэтам дзяржбясьпекі: «Позвы дзяўчаты атрымалі з пракуратуры, але на месцы апынуліся супрацоўнікі КДБ, якія ўсё і арганізоўвалі — шукалі памяшканьне для гутаркі, супрацоўніка пракуратуры, які б тую гутарку зладзіў». Гэтую здагадку ўскосна пацьвярджае той факт, што адна з размоваў не адбылася па прычыне адсутнасьці супрацоўніка пракуратуры, у той час, як супрацоўнік КДБ прысутнічаў.
Праваабаронца не выключае, што вынікам такой актыўнасьці з боку спэцслужбаў можа стаць новая крымінальная справа ў дачыненьні да сябраў незарэгістраванай арганізацыі.
Тым часам, на сайце «Бунту» зьявіўся зварот, у якім гаворыцца пра дзясятак выкліканых у пракуратуру, пра ціск, які аказваецца на бунтаўцаў у часе тых гутарак.
Нагадаем, што супраць сяброў руху Дзяніса Дзянісава і Тацяны Елавой у мінулым годзе была распачатая крымінальная справа паводле падзеяў у Віцебску. У лютым 2007 г. Дз. Дзянісаў быў арыштаваны і амаль тры месяцы адбыў у СІЗА. Потым справу прыпынілі.
