У Ярэмчы — райскім кутку ва ўкраінскіх Карпатах — зноў запрацавалі мабільнікі.
31 кастрычніка мабільную сувязь у мясцовасці адключылі па рашэнні гарадской рады. Аднак ужо 4 лістапада пад ціскам грамадскасці гарсавет адмяніў сваё рашэнне.
Спачатку група грамадзян настойвала на адключэнні мабільнай сувязі. Гэта, на іх думку, павысіла б прывабнасць Ярэмчы як курорта. Аднак некалькіх дзён, праведзеных без звыклай магчымасці патэлефанаваць дзіцю ў школу ці выклікаць экстраныя службы, хапіла, каб жыхары сабраліся на народны сход і перадумалі.
Радыёфобы лічаць, што хвалі мабільнай сувязі адмоўна ўплываюць на здароўе. Аднак навуковых пацверджанняў гэтаму пакуль не сабрана.
Ярэмча славіцца сваімі пансіянатамі ў гарадах, вадаспадамі на рэчцы Прут, гуцульскімі сувенірамі, гарналыжнымі трасамі Варохты і сонечным надвор'ем. Mobile free zone у спіс славутасцяў не дабаўляецца.