Лідар Руху «За свабоду», кандыдат на прэзідэнцкіх выбарах 2006 г. Аляксандр Мілінкевіч на сходзе актывістаў Руху пад Мядзелам распавёў сваё бачанне мэтаў беларускай апазіцыі на прэзідэнцкіх выбарах — 2015, паведамляе прэс-служба арганізацыі.

фота прэс-службы Руху "За свабоду"

Агульны стан дэмакратычных сілаў Мілінкевіч ахарактаразаваў як нездавальняючы: «У такім стане як сёння дэмсілы яшчэ не былі».

Старшыня Руху «За свабоду» перакананы, што сітуацыя не зменіцца, «пакуль мы не скажам, чаго хочам і якія мэты ставім на кампанію».

«Можна мэтай назваць падвышэнне рэйтынгу папулярнасці і вядомасці сваёй партыі ці арганізацыі. Але кансалідацыі тады не будзе. Мэта можа быць меркантыльная – грошы.

Натуральна, і ў такім разе не будзе аб’яднання. На маю думку, нам трэба дбаць пра ўзмацненне пазіцый усіх дэмакратычных сіл і раскруціць на лідара чалавека, якога мы не «знішчым» адразу пасля выбараў.

Я выступаю за тое, каб гэта быў адносна малады чалавек. Маладых і прыстойных хапае. Але разам з тым важная і біяграфія. Бо людзі часта пытаюць: «А чым ён кіраваў, чаго дасягнуў?».

Што праўда, гэта зрабіць складана. Дый прыклады Чыгіра, Марыніча, Казуліна паказваюць, чым гэта можа скончыцца, калі ў вялікую палітыку пойдзе асоба з уладных колаў з досведам кіравання», - заявіў Мілінкевіч.

Ён таксама зазначыў, што «калі ў электаральнай кампаніі 2015 году будзе ўдзельнічаць Лукашэнка, выбараў не будзе».

«Галоўнае – выйграць выбары пасля Лукашэнкі. Выйграць на карысць еўрапейскага выбару! Таму Руху неабходна актывізаваць працу ў кірунку еўрапеізацыі Беларусі», - сказаў Мілінкевіч.

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзеру