Праект указа Лукашэнкі, які тычыцца натарыята, падрыхтаваны і перададзены на разгляд у Адміністрацыю кіраўніка дзяржавы, паведаміў міністр юстыцыі Беларусі Алег Сліжэўскі.
«У адпаведнасці з праектам указа, з 1 студзеня 2014 натарыусы могуць страціць статус дзяржслужачых», — сказаў А.Сліжэўскі журналістам у сераду ў Мінску.
Пры гэтым ён удакладніў, што ў адпаведнасці з праектам указа «натарыят не плануецца рабіць прыватным, ён павінен працаваць на ўмовах самакіравання і самафінансавання, натарыяльныя канторы павінны захаваць арганізацыйную форму ажыццяўлення натарыяльнай дзейнасці».
А.Сліжэўскі таксама адзначыў, што будуць створаны органы натарыяльнага самакіравання ў выглядзе Беларускай натарыяльнай палаты.
«Мінюст гэтае рашэнне падтрымлівае. Цяпер распрацавана норма працы натарыята ў новых умовах», — сказаў міністр.
