Зязюля Юлія перасекла 22-ю паралель паўднёвага паўшар’я і дасягнула Паўднёва-Афрыканскай Рэспублікі (ПАР). За тры гады сачэння за еўрапейскімі зязюлямі, так далёка яшчэ не залятала ніводная птушка.
За апошнія некалькі дзён Юлія пераадолела больш за 1200 км і праляцела праз Зімбабвэ. Па апошніх дадзеных птушка дабралася да поўначы ПАР і зараз знаходзіцца ў правінцыі Лімпапо.
Апошні атрыманы радыёсігнал зафіксаваў, што птушка знаходзіцца непадалёку ад вёскі Tshivhungweni, за 16 км ад знакамітай ракі Лімпапо.
Гэтая мясцовасць знаходзіцца паміж дзвюма прыродаахоўнымі тэрыторыямі: прыродным рэзерватам Нванэдзі і знакамітым афрыканскім нацыянальным паркам Кругер.
Рэльеф тут узгорысты, аснову расліннасці складаюць велічныя баабабы, на адным з якіх магчыма зараз і сядзіць наша зязюля.
Цікава, што ўсяго ў шасці кіламетрах адсюль расце самы выляікі баабаб ПАР — баабаб Сагале.
