Найбуйнейшая аўтамабільная падзея краіны — міжнародны аўтасалон «Мотаршоу» — сёлета не адбудзецца.
Пра гэта паведаміў Дзмітрый Ярота — кіраўнік ТАА «Рэмарк», якое традыцыйна выступае арганізатарам мерапрыемства.
«Прынята канчатковае рашэнне. Часткова гэта звязана з тым, — растлумачыў ён, — што занятая асноўная выставачная пляцоўка — «Мінск-Арэна», дзе пройдзе чэмпіянат свету па хакеі».
Як адзначыў Ярота, яшчэ летась разам з членамі БАА планавалася, што наступная выстава «Мотаршоу» пройдзе праз два гады.
Акрамя таго, занадта шмат няпэўнасцей і фактараў, якія могуць паўплываць на рынак у гэтым годзе. Гаворка ідзе ў тым ліку пра няпэўнасці, звязаныя з увядзеннем у Беларусі ўтылізацыйнага збору.
У 2013 годзе месцам правядзення «Мотаршоу» ўпершыню быў абраны канькабежны стадыён «Мінск-Арэны». Свае стэнды прадставілі 24 аўтамабільныя маркі. Усяго на выставе было размешчана каля 200 аўтамабіляў. Паводле даных арганізатараў, выставу наведала прыкладна 65 тысяч чалавек.
