25 красавіка, напярэдадні чэмпіянату свету па хакеі, супрацоўнікі мінскай Дзяржаўтаінспекцыі пераходзяць на ўзмоцнены варыянт нясення службы.
Як паведамілі ва ўпраўленні ДАІ ГУУС Мінгарвыканкама, на дапамогу інспектарам гарадской Дзяржаўтаінспекцыі прыбудуць калегі з іншых рэгіёнаў краіны, якія таксама будуць арганізоўваць бяспеку дарожнага руху.
Прагназуецца, што вялікая нагрузка ў ходзе правядзення сусветнага першынства ляжа на дзяжурную часць, размешчаную ў будынку гарадскога ўпраўлення ДАІ на праспекце Дзяржынскага. Тут на час чэмпіянату працоўныя месцы будуць прадастаўлены валанцёрам, якія валодаюць замежнымі мовамі. Бо сярод удзельнікаў дарожнага руху чакаецца шмат замежных гасцей, з якімі ў выпадку неабходнасці запатрабуецца размаўляць на іх роднай мове.
«І супрацоўнікі ДАІ някепска падрыхтаваліся да сустрэчы гасцей. Для іх у кожным раёне своечасова былі арганізаваны спецыяльныя курсы па вывучэнні англійскай мовы. Так што праблем са зносінамі з прыезджымі не будзе», — гаворыцца ў паведамленні УДАІ ГУУС.
