Доля вакансій, размешчаных у Мінску у трэцім квартале 2014 года, склала 73% ад агульнай колькасці вакансій на айчынным рынку працы. Аднак сталіца паступова губляе долю размешчаных вакансій адносна рэгіёнаў: за год доля вакансій, размешчаных у Мінску, паменшылася з 77% да 73%.
У суседніх сталіцах, Кіеве і Маскве, доля працоўных вакансій адносна рэгіёнаў выглядае не так пагрозліва: 43% і 27% адпаведна.
У Беларусі таксама назіраецца рост канкурэнцыі сярод суіскальнікаў: за мінулы год колькасць рэзюмэ вырасла на 47%. Сёння на адну вакансію прыпадае 4,2 суіскальніка, тады як год таму іх было толькі 2,5.
Узровень айчыннай канкурэнцыі адстае ад казахскага і ўкраінскага, дзе на адну вакансію прэтэндуюць 5 чалавек, але пераўзыходзіць расійскі, дзе да трэцяга кварталу колькасць суіскальнікаў апусцілася да 2,5.
Самыя запатрабаваныя ў краіне – спецыялісты ў сферы продажаў і інфармацыйных тэхналогій. Доля гэтых абласцей за мінулы год узрасла. Даволі неблагія перспектывы чакаюць занятых у рэстаранным і гатэльным бізнэсе, лагістыцы, працоўны персанал, будаўнікоў.
