Амерыканскі канатаходзец і акрабат Нік Валенда на вачах у тысячаў людзей прайшоў па тросе, нацягнутым паміж хмарачосамі ў Чыкага. Частку маршруту ён пераадолеў без страхоўкі з завязанымі вачыма.
35-гадовы гімнаст, чые трукі ўжо шэсць разоў заносіліся ў Кнігу рэкордаў Гінеса, спачатку прайшоў па тросе, які злучае дзве вежы на розных берагах ракі (яна, як і горад, называецца Чыкага).
Другая частка шляху была карацейшая — трос паміж вежамі комплексу будынкаў «Марына-сіці» на паўночным беразе ракі Чыкага. Тут Валенда надзеў на вочы павязку і адмовіўся ад страхоўкі.
Над ракой ён прайшоў за 6 хвілін 52 секунды. Пры гэтым канатаходзец знаходзіўся на вышыні звыш 150 метраў, вытрымліваючы парывы ветру да 40 км/г. Трос быў нацягнуты пад нахілам у 17 градусаў.
Адлегласць паміж вежамі «Марына-сіці» Валенда пераадолеў за адну хвіліну 17 секунд.
Трукі трансляваліся ў прамым эфіры тэлебачання з 10-секунднай затрымкай — на выпадак, калі нешта пойдзе не так.
На зямлі Валенду — гімнаста ў сёмым пакаленні — віталі тысячы людзей.
На прэс-канферэнцыі ён адказваў на пытанні журналістаў, не здымаючы павязкі з вачэй.
Першыя крокі па канаце гімнаст зрабіў ва ўзросце двух гадоў. У 2013 годзе ён перасёк Вялікі каньён па тросе, нацягнутым на вышыні больш за 450 метраў.
