Інспектарат вайсковых узбраенняў Польшчы прапануе вытворцам зброі паўдзельнічаць у конкурсе на пастаўку войску новых лёгкіх аднаразовых гранатамётаў для замены састарэлых RPG-76 Komar, паведаміў сайт polska-zbrojna.pl.
Новы гранатамёт мусіць быць невялікага памеру і вагі, выкарыстоўвацца ў асноўным для знішчэння лёгкай бранятэхнікі. Таксама прадугледжваецца, што з яго можна будзе страляць у памяшканнях.
Польскі жаўнер з RPG-76 Komar у Афганістане.
Зараз польскія вайскоўцы маюць на ўзбраенні ручныя гранатамёты РПГ-7 яшчэ савецкай распрацоўкі і лёгкія RPG-76 Komar. Для змагання з сучаснымі танкамі ў палякаў ёсць універсальныя гранатамёты Grg m/48 Carl Gustav шведскай вытворчасці.
Перамовы з вытворцамі зброі працягнуцца да сакавіка 2015 году, а тэндар можа быць абвешчаны ў 2016 годзе, сказала прадстаўніца Інспектара ўзбраенняў Маргарыта Асалінская.
Пакуль невядома, колькі новых гранатамётаў замовіць армія, але каб замяніць усе 90.000 RPG-76 Komar спатрэбяцца некалькі сотняў мільёнаў даляраў.