Ад 2 снежня ў Вярхоўным судзе Беларусі працягваецца працэс па справе аб атрыманні хабару былым намеснікам старшыні Беларускага вайсковага суда Юрыем Тузавым (па ч. 3 арт. 430 КК). Старшынюе на працэсе Аляксей Цяцюхін.
Яшчэ адзін фігурант крымінальнай справы — начальнік аддзела продажаў замежнага прадпрыемства «Інка-фуд» па Гродзенскай вобласці Сяргей Шымчук. Ён абвінавачваецца ў дапамаганні ў дачы хабару (ч. 6 арт. 16, ч. 2 арт. 431 КК).
Інкрымінаваныя абвінавачаным падзеі мелі месца вясной 2013 года.
Тузаў знаходзіцца пад вартай і, адпаведна, у зале суда — у клетцы. Ён быў затрыманы 18 чэрвеня. Шымчука затрымалі 13 чэрвеня. Спачатку ў дачыненні да яго была абраная мера стрымання ў выглядзе заключэння пад варту, затым яго вызвалілі пад заклад.
Па версіі следства, Тузаў, будучы намеснікам старшыні Беларускага вайсковага суда, ініцыяваў і падтрымаў перагляд i адмену прысуду суда першай інстанцыі ў дачыненні да Аляксандра Двараніновіча — сына Васіля Двараніновіча, былога міністра сельскай гаспадаркі і харчавання, члена Савета Рэспублікі, дэпутата Палаты прадстаўнікоў. Двараніновіча-малодшага за карупцыйныя злачынствы Брэсцкі міжгарнізонны вайсковы суд асудзіў да пяці гадоў пазбаўлення волі, канфіскацыі усёй маёмасці і штрафу ў 100 базавых велічынь. Ён праходзіў па справе, у якім адным з абвінавачаных быў супрацоўнік органаў памежнай службы, таму і суд быў вайсковы.
З прапановай дапамагчы змякчыць асуджанаму пакаранне або вызваліць яго ад пакарання да Тузава і звярнуўся Шымчук ад імя бацькоў асуджанага. З асуджаным Шымчук сябраваў яшчэ з часоў вучобы ў Гродзенскім дзяржаўным аграрным універсітэце, быў знаёмы па працы з ягоным бацькам. А з Тузавым, у сваю чаргу, Шымчук вучыўся разам на юрфаку БДУ.
За свае паслугі Тузаў, як гаворыцца ў абвінавачванні, запатрабаваў спачатку 15 тыс. даляраў, а затым яшчэ 5 тыс. даляраў. Гэтыя грошы (15 тысяч) вайсковы суддзя атрымаў 24 красавіка 2013 года пры сустрэчы сваім памагатым у адной з вёсак Валожынскага раёна.
Палкоўнік юстыцыі ў адстаўцы Юрый Тузаў заявіў на працэсе, што не прызнае сябе вінаватым у інкрымінаваным яму атрыманні хабару.
Сяргей жа Шымчук сваю віну прызнаў цалкам.
У судзе Шымчук расказаў, што неўзабаве пасля выхаду Аляксандра Двараніновіча на свабоду следства зноў ім зацікавілася, гаворка пайшла аб магчымым завядзенні новай крымінальнай справы. Экс-міністр, Двараніновіч-старэйшы стаў выстаўляць прэтэнзіі пасярэдніку і суддзі, патрабаваў, каб намарна заплачаныя грошы былі вернутыя.
Цікавая дэталька: са словаў Шымчука, калі Двараніновіч-сын ізноў аказаўся ў небяспецы, Двараніновіч-старэйшы палічыў сябе ашуканым і гаварыў, што мае намер звярнуцца да прэзідэнта.
У гэтай сітуацыі, сказаў Шымчук, ён параіў Двараніновічу звярнуцца да старшыні Беларускага вайсковага суда (што Двараніновіч потым і зрабіў), генеральнага пракурора і папярэдзіў, што сам былы чыноўнік можа панесці крымінальную адказнасць як давальнік хабару.
У выніку ўжо пасля гэтага Шымчуку стала вядома, што Тузаў вярнуў 15 тысяч даляраў Двараніновічу назад.
Як гаворыцца ў абвінаваўчым заключэнні, змякчальных абставінаў датычна Тузова не маецца. Абцяжваючай з'яўляецца тое, што злачынства было здзейснена з карыслівай зацікаўленасці.
Што тычыцца Шымчука, то тут наадварот: абцяжваючых абставін не ўстаноўлена, змякчальныя — садзейнічанне следству і малалетняе дзіця на ўтрыманні. Таму ён і не ў клетцы.
Узнятую абаронай Тузава тэму, чаму сведка, даведаўшыся пра злачынства, не паведаміў пра яго ў праваахоўныя органы, суд развіць не даў.
Дарэчы, тую другую порцыю грошай, 5 тыс. даляраў, Шымчук на стадыі папярэдняга следства перавёў у беларускія рублі і пералічыў на рахунак Следчага камітэта.
