Жыхары Беларусі не сутыкаюцца з праблемамі з-за сваёй рэлігійнай прыналежнасці, заявіў сёння журналістам Упаўнаважаны па справах рэлігій і нацыянальнасцей Леанід Гуляка перад пачаткам міжнароднай навукова-практычнай канферэнцыі «Міжнацыянальная згода і талерантнасць — каштоўнасная аснова еўразійскай інтэграцыі».

Беларусь — шматнацыянальная і шматканфесійная дзяржава. Як адзначыў Леанід Гуляка, у Беларусі адчуваюць сябе камфортна прадстаўнікі ўсіх пражываючых нацыянальнасцей (згодна з перапісам насельніцтва 2009 года, іх 140). З 25 канфесій самая масавая — праваслаўе (амаль 84 працэнты вернікаў), католікамі з'яўляюцца 12,5 працэнта вернікаў, астатнія канфесіі прадстаўлены лютэранамі, іўдзеямі, мусульманамі і іншымі. «Няма падстаў гаварыць, што з-за рэлігійнай прыналежнасці ў вернікаў у нашай краіне ёсць нейкія праблемы», — падкрэсліў Упаўнаважаны па справах рэлігій і нацыянальнасцей.

На думку Леаніда Гулякі, вялікім вопытам у выбудоўванні гарманічных міжнацыянальных і міжрэлігійных адносін вылучаецца партнёр Беларусі па МС і Еўразійскім эканамічным саюзе Казахстан, дзе рэалізуецца ўнікальная мадэль міжэтнічнай і міжнацыянальнай згоды - Асамблея народа, аналагаў якой няма ва ўсім свеце. У гэтым плане вопыт Казахстана можа ўяўляць інтарэс для іншых краін.

Надзвычайны і Паўнамоцны Пасол Казахстана ў Беларусі Ергалі Булегенаў адзначыў, што з першых дзён незалежнасці Казахстан праводзіць мэтанакіраваную палітыку ў галіне міжнацыянальных адносін і талерантнасці, у выніку чаго ў краіне захоўваюцца мір і спакой. Паводле слоў дыпламата, вопыт Казахстана цікавы не толькі Асамблеяй народа. Так, пачынаючы з 2003 года, праводзіцца з'езд лідараў сусветных і традыцыйных рэлігій. Вынікі з'ездаў сведчаць аб тым, што яны з'яўляюцца добрай дыялогавай пляцоўкай для прадстаўнікоў усіх рэлігій, кожны з'езд колькасць дэлегацый павялічваецца — у апошнім з'ездзе ў 2012 годзе прынялі ўдзел дэлегацыі з 85 краін свету, расказаў пасол.

Міжнародная канферэнцыя арганізавана ў Мінску Інстытутам філасофіі Нацыянальнай акадэміі навук Беларусі сумесна з пасольствам Казахстана ў Беларусі. Мерапрыемства праходзіць у фармаце экспертнай дыскусіі, у ім прымаюць удзел кіраўнікі дыпламатычных місій краін СНД і шэрага іншых дзяржаў, работнікі органаў дзяржаўнай улады і кіравання, спецыялісты-гуманітарыі, якія прадстаўляюць НАН і вышэйшыя навучальныя ўстановы краіны. У дыялогу ўдзельнікаў канферэнцыі плануецца выпрацаваць скаардынаваныя падыходы па пашырэнні ідэй міжнацыянальнай згоды і талерантнасці на еўразійскай прасторы ў інтарэсах мірнага суіснавання, сацыяльна-эканамічнага развіцця і інтэграцыі. Асаблівую значнасць гэтыя ідэі набываюць у кантэксце ўступлення ў сілу дагавора аб Еўразійскім эканамічным саюзе з 1 студзеня 2015 года.

У час канферэнцыі абмяркоўваецца вопыт Казахстана, Беларусі і іншых дзяржаў еўразійскай прасторы ў справе забеспячэння гармоніі міжэтнічных і міжканфесійных адносін.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру