Міністэрства аховы здароўя не павінна баяцца прызнаць, калі з прыняццем рашэння аб новым парадку водпуску лекавых сродкаў у аптэках была зробленая памылка, заявіў Аляксандр Лукашэнка, прымаючы 9 снежня з дакладам міністра аховы здароўя Васіля Жарко.
«І калі вы ажыццяўляеце нейкія дзеянні, вы ж спачатку людзям раскажыце. І адначасова! А не потым, калі ўсе людзі ў чэргі сталі і штурмуюць аптэкі і паліклінікі», — прыводзіць словы Лукашэнкі прэс-служба прэзідэнта.
«Гэтая ваша вядомая пастанова, якая, як мне здалося, выклікала буру эмоцый у нашым грамадстве. Людзі пачалі скардзіцца, што міністэрства займаецца не тым, чым трэба, Міністэрству аховы здароўя трэба заняцца ўмовамі лячэння і гэтак далей і гэтаму падобнае, а не ўстанаўленнем нейкіх бюракратычных перашкод», — сказаў беларускі кіраўнік.
Аляксандр Лукашэнка адзначыў, што папрасіў як асобных дактароў расказаць пра сітуацыю, так і даручыў Інфармацыйна-аналітычнаму цэнтру пры Адміністрацыі прэзідэнта правесці даследаванне ў грамадстве.
«Людзі настроеныя вельмі негатыўна! І нельга супрацьпаставіць іх меркаванню нічога! — падкрэсліў ён. — Дапусцім, навошта гэта было ўводзіць напярэдадні рознага кшталту вірусаў, эпідэмій, вострага перыяду захворвання? Нагрузка на дактароў павялічылася пры выпісцы. І шмат іншых пытанняў і праблем».
«Вы мне гаворыце аб тым, што хтосьці там лабіруе гэтыя працэсы, камусьці не падабаецца, у сродках масавай інфармацыі ўздымаюць пытанні, а на самай справе прынята правільнае рашэнне. Я не выключаю, што камусьці гэта не падабаецца. І гэта ў нас заўсёды бывае», — заявіў Лукашэнка.
На яго думку, бізнесмены, уласнікі аптэк і гэтак далей «укідваюць у сродкі масавай інфармацыі свае незадавальненні». «Так, на гэта трэба рэагаваць, трэба, каб валюта ў краіне заставалася і іншае. Але трэба рабіць гэта разумна, каб не ствараць праблем людзям», — адзначыў афіцыйны лідар.
Васіль Жарко у сваю чаргу звярнуў увагу на тое, што прынятая ў верасні гэтага года пастанова, якая прадугледжвае ўзмацненне кантролю за рэцэптурным водпускам лекавых сродкаў, з'яўляецца па сутнасці працягам пастановы, прынятай у 2012 годзе, па пераліку рэцэптурнага і безрэцэптурнага водпуску лекавых сродкаў. Паводле яго слоў, гэты пералік не пашыраны ні на адзін лекавы сродак. Сёлета была ўведзена толькі адна норма: захоўвання рэцэпта ў аптэцы на працягу месяца. Міністэрства аховы здароўя адзначае значны рост аб'ёму спажывання лекавых сродкаў. У выніку аналізу сітуацыі міністэрства прыйшло да заключэння, што частка лекавых сродкаў рэцэптурнага спісу адпускаецца без рэцэпта. Паводле слоў Жарко, часцей за ўсё гэта адбываецца ў камерцыйных структурах.
Лукашэнка пацікавіўся ў міністра, колькі прыватных аптэк было закрыта ў сувязі з гэтым парушэннем. Паводле слоў Жарко, сёлета прыпынена праца 10 аптэк, яшчэ дзве аптэкі закрытыя.
«Сярод тысяч аптэк вы дзве закрылі. А вы павінны былі іх папярэдзіць: адно парушэнне (гэта ж бяспека, здароўе людзей) — аптэку закрылі, другую закрылі, трэцюю, пятую, дзясятую і ўсё б нармалізавалася», — лічыць беларускі кіраўнік.
Міністр адзначыў, што складана даказаць парушэнне водпуску лекаў у аптэцы, калі рэцэпт у ёй не застаецца. «Я штоквартальна збіраю ў міністэрстве тых, хто займаецца і оптам, і розніцай, і папярэджваю: няма абгрунтавання павелічэння водпуску лекавых сродкаў», — сказаў Жарко.
Лукашэнка запатрабаваў «жалезна навесці парадак».
