«Варта было дажыць да 42 гадоў, каб нарэшце зрабіцца дзіцячым паэтам. Нават са сваёй кніжкай, якая вось-вось выходзіць па-беларуску», — распавядае Хадановіч блогу labadzenka.by. — «Нататкі таткі» пісаліся пяць гадоў. Зразумела, музай-натхняльніцай была і ёсць дачка Алена. Аленка падрастала – і здараліся новыя і новыя нагоды нешта зарыфмаваць. Такія сабе вершы на ўсе выпадкі жыцця».
Хадановіч прыводзіць прыклады вершаў, што запомніліся яго дачцэ:
Татка сеў пісаць нататку,
А малая – скок на татку.
Цап яго за бараду:
Беражыся – я іду!
***
Ёсць у нас пыласос.
Ён гудзе, як паравоз.
А за ім наўздагон
Ходзіць татка, як вагон.
***
Шакаладную цукерку
Смачную хачу!
За яе аддам талерку,
Поўную баршчу.
Кніга выйшла з аздабленні мастачкі Наталлі Кійко. «Нататкі таткі» доўга чакалі свайго часу: кніга ўжо перакладзеная на нямецкую і ўкраінскую і нават надрукаваная па-ўкраінску. Цяпер з’явілася магчымасць замовіць яе ў Беларусі.
«Нататкі таткі» прадаецца без гандлёвых нацэнак, плаціць грошы наперад не трэба. 88 старонак, друк каляровы, папера глянцавая, вокладка цвёрдая.
Кніга будзе надрукаваная цягам месяца-двух. Яе кошт складзе прыблізна 120 тысяч рублёў.
Каб набыць кнігу, трэба:
- Падпісацца на яе на сайце labadzenka.by.
- Дачакацца паведамлення аб выхадзе кнігі на электронную пошту.
- Прыйсці ў прызначаны дзень ў кнігарню і на месцы аплаціць кнігу.
- Альбо атрымаць кнігу поштай з дастаўкай за 40-50 тысяч па Беларусі.
Разам з кнігай «Нататкі таткі» можна набыць «Дзіцячую заМОВУ» Глеба Лабадзенкі.