Прэзідэнт Еўрапейскага банка рэканструкцыі і развіцця (ЕБРР) Сума Чакрабарці наведае Мінск 17—18 лютага. Гэта будзе першы візіт кіраўніка ЕБРР у Беларусь.
Як паведаміў старшы саветнік банка Антон Усаў, запланаваныя сустрэчы Сумы Чакрабарці з кіраўніком дзяржавы Аляксандрам Лукашэнкам, прэм'ер-міністрам Андрэем Кабяковым, міністрамі эканомікі і замежных спраў.
Паводле слоў Усава, падчас візіту будуць абмяркоўвацца пытанні магчымага пашырэння супрацоўніцтва Беларусі і ЕБРР. Апрача таго, Сума Чакрабарці плануе наведаць завод па вытворчасці рухомага саставу кампаніі «Штадлер» у Фаніпалі — гэты праект рэалізуецца пры ўдзеле ЕБРР.
У прэзідэнта Еўрапейскага банка рэканструкцыі і развіцця таксама запланаваныя сустрэчы з прадстаўнікамі няўрадавых арганізацый і дыпламатычнага корпуса.
Еўрапейскі банк рэканструкцыі і развіцця — міжнародная фінансавая арганізацыя са штаб-кватэрай у Лондане, створаная для падтрымкі трансфармацыі эканомікі ў дзяржавах Цэнтральнай і Усходняй Еўропы. ЕБРР пачаў дзейнічаць у красавіку 1991 года.
Асноўныя акцыянеры банка — ЗША, краіны Еўрапейскага саюза, Японія. Беларусь з'яўляецца паўнапраўным членам ЕБРР з 1992 года. З 1994 года ў краіне адкрытае пастаяннае прадстаўніцтва банка. 31 сакавіка 2014 года адбылося афіцыйнае адкрыццё новага офіса банка ў Мінску.
За час сваёй дзейнасці ў Беларусі ЕБРР браў удзел у рэалізацыі 66 праектаў. Сумарны аб'ём прыцягнутых інвестыцый ацэньваецца ў 1 млрд 502,4 млн. еўра.
Рэсурсы ЕБРР, што выдзяляюцца Беларусі, накіроўваюцца на развіццё малога і сярэдняга бізнесу. У 2014 годзе ЕБРР разлічваў укласці ў эканоміку Беларусі прыкладна 220 млн. еўра.
Апошнім часам сумесна з ЕБРР у Беларусі пачатыя некалькі знакавых інвестыцыйных праектаў у сферы дрэваапрацоўкі (завод «Кронаспан»), вытворчасці напояў (піваварні «Хайнекен») і рухомага саставу (ААТ «Штадлер Мінск»).
Ход і перспектывы ажыццяўлення Стратэгіі ЕБРР для Рэспублікі Беларусь, рэалізацыя наяўных і новых інвестыцыйных праектаў былі абмеркаваныя ў межах кансультатыўнага візіту ў Мінск прадстаўнікоў савета дырэктараў ЕБРР, які прайшоў 22—26 верасня 2014 года.
