Дзіця сціплага кітайскага настаўніка Джэка Ма — гандлёвая пляцоўка Aliexpress — стала надзвычай папулярнай у беларусаў.

Паводле аналітычных дадзеных аналізатара Alexa, Aliexpress займае 12-е месца па наведвальнасці з Беларусі. Гэта не дзіва: на сайце можна набыць тавары, цэны на якія ў Беларусі значна вышэйшыя пры бяднейшым асартыменце. Пакупкі пры гэтым яшчэ і бясплатна даставяць амаль да парога.

Але калі мабільныя тэлефоны і іншыя рэчы першай неабходнасці набытыя, наступае час тавараў для душы. А Aliexpress дапаможа любому і ў гэтай справе. Нават таму, хто не ўяўляе жыцця без бел-чырвона-белага сцяга і герба «Пагоня» хоць на чым. Так, гэтыя сімвалы не выкарыстоўваюцца афіцыйна, але попыт на іх ёсць. А кітайцы — майстры задавальняць попыт.

Усяго за 15 даляраў можна набыць сабе вялікі (90 на 150 сантыметраў) бел-чырвона-белы сцяг.

Можна замовіць такі ж, толькі з «Пагоняй» пасярэдзіне.

Яшчэ адзін варыянт — сцяг з крыжом святога Георгія і «Пагоняй».

Ёсць і проста «Пагоня» на чырвоным фоне таго ж памеру.

Значок на штрыфель пінжака. 

Існуюць і больш кампактныя варыянты нацыянальнай сімволікі. Напрыклад, металічны значок на штрыфель пінжака ў выглядзе контура Беларусі з нанесеным на яго бел-чырвона-белым сцягам. Такі варыянт падыйдзе для аматараў афіцынага стылю адзення і будзе добра пасаваць фармату сур'ёзных сустрэч. Аднак адзін значок не купіць, можна замовіць толькі партыю з 200 штук за 316 даляраў.

Больш бюджэтны варыянт — круглыя значкі з контурам Беларусі і БЧБ сцягам, 20 штук за 18 даляраў.

Самая танная рэч з бел-чырвона-белым сцягам — тканевая нашыўка. 10 штук абыйдуцца ў 7,5 даляраў.

Прэзідэнцкі штандар 120 на 120 сантыметраў. Ці прынамсі яго копія. 

А вось аматарам цяперашняй дзяржаўнай сімволікі сапраўды ёсць дзе разгарнуцца. Можна замовіць сабе просты сцяг, прычым чырвона-зялёнае палотнішча 90 на 150 сантыметраў абыйдзецца амаль у два разы танней за бел-чырвона-белы сцяг такога самага памеру. Кампект са 100 сцяжкоў 14 на 21 сантыметр абыйдзецца прыкладна ў 20 даляраў — хопіць на ўсіх сяброў і знаёмых. Для самых амбіцыёзных прадаецца нават прэзідэнцкі штандар з залатым гербам.

Значкі, шэўроны, нашыўкі. 

Дзіўны значок з Мікі Маўсам прадаюць толькі вялікімі партыямі. 

Ёсць і металічныя значкі на штрыфель — адразу некалькіх відаў, і звычайныя значкі, і нашыўкі з шэўронамі. Аднак гэта ўсё даволі неарыгінальна.

Для тых, хто сапраўды жадае вылучыцца, прадаецца, напрыклад, медаль «Герой Беларусі». Залатая зорка на чырвона-зялёнай стужцы каштуе 68 даляраў.

Сапраўдныя арыстакраты ацэняць элегантны кішэнны механічны гадзіннік з выявай герба Беларусі на накрыўцы. Прадавец просіць за яго ўсяго 20 даляраў, а задаволеныя пакупнікі пакідаюць 5-бальныя водгукі.

Уладальнікі iPhone могуць замовіць сабе чахлы з беларускім дзяржаўным сцягам — яны выпускаюцца ў некалькіх варыяцыях і каштуюць літаральна нічога.

Незвычайна выглядаюць і срэбныя пацеркі 925-й пробы з чырвона-зялёным сцягам — 14 даляраў за штуку. 

Для завяршэння вобразу падыйдуць перфарацыйныя акуляры з дзяржаўным сцягам — 15 даляраў за партыю з 5 штук.

Не абмінулі ўвагай кітайскія вытворцы і тых, хто сумуе па савецкіх часах. На сайце Aliexpress можна набыць кішэнны гадзіннік ці футболку з выявай герба БССР. А вось пра Аляксандра Лукашэнку забыліся — на ўсім Aliexpress няма ніводнай рэчы з яго выявай. Відаць, усе вытворчыя магутнасці заняты выпускам тавараў з Пуціным, якіх прадаецца безліч.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру