28 лютага 2015 года ў 16:00 у зале пастаяннай экспазіцыі «Мастацтва краін Усходу XV – пач. XXI ст.» Нацыянальнага мастацкага музея РБ адбудзецца лекцыя «Архітэктура Карэі».
Гісторыя архітэктуры Карэі налічвае больш за 2 тысячы гадоў, пачынаючы ад пераносных начлежак часоў неаліту і да сучасных небаскробаў Сеула. У той жа час на працягу ўсёй сваёй гісторыі архітэктура гэтай дзіўнай краіны захавала сваю самабытнасць і ўнікальнасць, беражліва з веку ў век захоўваючы і перадаючы архітэктурную традыцыю ад пакалення да пакалення.
Карэя зведала моцны ўплыў архітэктурнай традыцыі Кітая. З Кітая прыйшоў будызм, пачала развівацца храмавая архітэктура. Аднак карэйскія архітэктары ўнеслі свае дапаўненні ў храмавую архітэктуру. Так з’явілася мураваная пàгада пэўнага архітэктурнага стылю – пэкчэ. Як прыклад, адзін з самых вядомых храмаў свету – Сакурам і манастыр Пульгукса. У той жа час архітэктура Карэі аказвала немалы ўплыў на Японію.
Да нашых дзён у Карэі ўцалела вельмі мала старадаўніх будынкаў. Часткова гэта выклікана тым, што драўляныя збудаванні ў вільготным і гарачым карэйскім клімаце даўжэй, чым пару стагоддзяў, увогуле не могуць захавацца. Аднак куды большую шкоду помнікам карэйскай архітэктуры нанеслі спусташальныя войны, якія не раз пракатваліся па Карэйскім паўвостраве.
У XXI стагоддзі засталося мала збудаванняў, створаных па правілах традыцыйнай архітэктуры, але ўплыў традыцый відавочны, калі глядзець на многія сучасныя карэйскія будынкі.
На лекцыі мы прасочым асноўныя этапы развіцця карэйскай архітэктуры, разгледзім, якім чынам традыцыі прымяняюцца на практыцы сёння.
Лектар – Руслан Абрамовіч, малодшы навуковы супрацоўнік аддзела рускага і замежнага мастацтва.
artmuseum.by
Нацыянальны мастацкі музей РБ
адрас: г. Мінск, вул. Леніна, 20
