Сёлета ў Беларусі чакаецца нізкая веснавая паводка, паведаміла на прэс-канферэнцыі 11 сакавіка ў Мінску начальнік аддзела гідралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджання і маніторынгу навакольнага асяроддзя Марына Нагібіна. 

Паводка на Прыпяці. Фота Сяргея Плыткевіча

Разам з тым, зазначыла яна, магчымыя і неспрыяльныя наступствы. «Могуць назірацца затапленні рачнымі водамі аб'ектаў гаспадарання і прыватных дамоў у зонах павышанай рызыкі (напрыклад нізкаўзроўневыя масты і забудовы ў поймах рэк). Так, паводле звестак МНС, затоплены аўтамабільны мост цераз раку Сож і аўтадарога Парадзіна — Засожжа каля вёскі Парадзіна ў Мсціслаўскім раёне Магілёўскай вобласці. Таксама ў выпадку значных ападкаў магчымыя падтапленні дажджавымі водамі паніжаных участкаў рэльефу, не звязаных непасрэдна з рэкамі. Разам з гэтым паніжэнне воднасці рэк і вадаёмаў пры дэфіцыце ападкаў можа ўскладніць водагаспадарчую дзейнасць і пагоршыць экалагічны стан», — зазначыла спецыяліст. 

Паводле яе слоў, на большасці рэк веснавая паводка зараз фарміруецца ва ўмовах дэфіцыту ападкаў і адсутнасці на тэрыторыі краіны снежнага покрыва. «Вызначальнымі фактарамі, што ўплываюць на характар паводкі, з'яўляюцца ўмовы надвор'я ў сакавіку: ападкі і тэмпература паветра. Наяўны сутачны ход тэмпературы паветра садзейнічае страце паверхневага сцёку на выпарванні днём і выхалоджванні ноччу», — зазначыла Нагібіна. 

Яна таксама паведаміла, што «максімальныя значэнні ўзроўняў вады веснавой паводкі ў басейнах Заходняй Дзвіны, Нёмана, Віліі, Дняпра, Бярэзіны і Сожа прагназуюцца значна ніжэйшымі за сярэднія шматгадовыя максімумы і блізкімі да максімальных значэнняў узроўняў вады вясной 2014 года, гэта значыць блізкімі да ніжэйшых значэнняў за перыяд назіранняў». 

Паводле прагнозаў сіноптыкаў, у выніку праходжання нізкай паводкі пойменныя землі ўздоўж рэк будуць залітыя вадой вясной толькі на асобных участках і на непрацяглы час, значных затапленняў рачнымі водамі прыбярэжных тэрыторый не чакаецца. «На рэках басейнаў Заходняга Буга і Прыпяці фарміраванне веснавой паводкі пакуль не чакаецца, развіццё дажджавых паводак вясной магчымае толькі пры выпаданні значнай колькасці ападкаў», — зазначыла начальнік аддзела. 

Сінаптычнае становішча ў студзені—лютым гэтага года абумовіла рост узроўняў вады, крыгалом рэк і ачышчэнне іх ад лёду раней за звычайныя тэрміны — у сярэднім на месяц; зіма ў цэлым характарызавалася неаднародным тэмпературным рэжымам з перавагай цёплага надвор'я і з-за гэтага няўстойлівым заляганнем снежнага покрыва; у выніку неаднаразовых зімовых адлігаў на ўсіх рэках сфарміраваліся ў студзені і лютым зімовыя паводкі за кошт паверхневага і ўнутрыглебавага сцёку, выхаду вады на пойму не адзначалася, і небяспечных значэнняў узроўні вады не дасягалі. 

Паводле слоў эксперта, назіранні за гідралагічным рэжымам рэк аператыўна праводзяцца на 64 водапастах, паступае таксама інфармацыя з 42 пастоў з Расіі, Украіны, Літвы, Латвіі, Польшчы.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру