Windows-планшэты з 32 Гб памяці практычна не пакідалі карыстальніку вольнага месца — аперацыйная сістэма займала палову памяці. Microsoft паабяцала выправіць гэта ў Windows 10.
Выява: Microsoft
Адзін са шляхоў эканоміі месца — сцісканне файлаў з дапамогай Cleanup Utility. Праграма дазволіць зэканоміць 1,5 Гб для 32-бітнай сістэмы і 2,6 Гб для 64-бітнай.
Другі шлях — новая сістэма рэзервнага капіявання. Цяпер сістэма не будзе ў экстранным выпадку аднаўляцца з асобнага віртуальнага дыску, а будзе наноў «збірацца» з прысутных файлаў. Гэта дазволіць аднавіць сістэму адразу са спампаванымі абнаўленнямі і зэканоміць ад 4 да 12 Гб памяці.
Агулам з усталёўкай Windows 10 замест Windows 8.1 уладальнікі планшэтаў атрымаюць 5-10 Гб вольнага месца.
***
Windows 10 была прадстаўленая ўвосень 2014 года. Яна будзе адзінай для настольных камп’ютараў, ноўтбукаў і вялікіх планшэтаў, будзе цесна інтэграваная са смартфонамі. Абнаўленне да «дзясяткі» з Windows 7 і 8 будзе бясплатным. Фінальная версія будзе выпушчаная ўвосень 2015 года, папярэднюю тэставую версію можна спампаваць тут.
