Праблем з няхваткай працоўных месцаў у Беларусі няма, кожны пры жаданні можа працаўладкавацца.
Аб гэтым заявіў журналістам намеснік прэм'ер-міністра Анатоль Калінін, каменціруючы падпісанне дэкрэта нумар 3 «Аб папярэджанні сацыяльнага ўтрыманства».
На думку віцэ-прэм'ера, дакумент вельмі своечасовы, калі не сказаць нават крыху запознены. «Грамадства спарадзіла і спараджае ўтрыманцаў», — канстатаваў Анатоль Калінін. Пры гэтым ён звярнуў увагу, што праблем з прапановамі на рынку працы рэспублікі няма.
«Працоўных месцаў дастаткова. Выбірай — і ідзі працуй, — падкрэсліў намеснік прэм'ер-міністра. — Калі ж нехта не хоча працаваць, значыць ён павінен плаціць тую частку, якая яму належыць, у падатак, каб не абцяжарваць бюджэт і добрасумленных падаткаплацельшчыкаў».
