Гомельскі актывіст Юрый Рубцоў, які абвінавачваецца ва ўхіленні ад адбывання пакарання, вечарам 13 красавіка будзе дастаўлены ў следчы ізалятар у Баранавічах, паведаміла праваабаронца Анастасія Лойка.
«Цяпер яго перавозяць з Пружанскага ІЧУ, і ў Баранавічах ён будзе ўжо сёння вечарам», — сказала яна.
Афіцыйныя абвінавачанні Рубцову былі выстаўленыя 9 красавіка. На наступным тыдні, сказала Лойка, гомельскі актывіст і яго адвакат пачнуць знаёміцца з матэрыяламі крымінальнай справы.
Днём 6 красавіка Рубцоў быў дастаўлены з папраўчай установы адкрытага тыпу ў вёсцы Куплін (Пружанскі раён Брэсцкай вобласці), дзе ён адбываў пакаранне, у Пружанскі раённы аддзел Следчага камітэта. Там стала вядома, што актывіст абвінавачваецца на падставе арт. 415 Крымінальнага кодэкса (ухіленне ад адбывання пакарання ў выглядзе абмежавання волі). Рубцоў адмовіўся ад паслуг прапанаванага яму дзяржаўнага адваката і абвясціў галадоўку. Ён таксама адмовіўся ад давання паказанняў следчаму Вользе Барадоўскай, якая вядзе яго крымінальную справу.
Нагадаем, 6 кастрычніка 2014 года суд Цэнтральнага раёна сталіцы прыгаварыў 53-гадовага Рубцова да двух з паловай гадоў абмежавання волі з накіраваннем у папраўчую ўстанову адкрытага тыпу, аднак з улікам амністыі рэальны тэрмін пакарання быў скарочаны да паўтара года. Рубцоў абвінавачваўся ў знявазе суддзі суда Савецкага раёна Кірыла Палулеха, які вёў у дачыненні да яго адміністрацыйны працэс пасля акцыі «Чарнобыльскі шлях» 28 красавіка 2014 года ў Мінску (арт. 391 Крымінальнага кодэкса).
